ISankofa Tour iza ePlayhouse kule mpelasonto
Intandokazi yomculi we-Afro Pop uThandiswa Mazwai uzobe enza adume ngakho kule mpelasonto eThe Playhouse ekhonsathini yakhe eyaziwa nge “The Sankofa Tour”.
Le khonsathi eqale eGoli ekuqaleni kukaNhlaba ifike ngesikhathi esihle kwelikabhanana njengoba kade izinkumbi zezakhamuzi zaseNingizimu Afrika zivota ngoLwesithathu. Lena indlela emnandi yokwetshisa impelasonto. Phela kusukela ngowezi-1996 mhla uThandiswa eqala kule ndima, usebe ngomunye wamaciko asayibambile kuze kube imanje.
ISankofa, nokuyiqoqo lamaculo aliqophe kuleli, eDakar naseNew York ihlanganisa isigqi sakwabo kwaXhosa, eseJazz nengxube yesigqi samanye amazwe angasentshonalanga ne-Afrika.
Kulo leli qoqo uphinde wapika amaciko ahlanganisa uMeshell Ndegeocello, uNduduzo Makhathini, uTendai Shoko noThandi Ntuli.
Kule khonsathi angeke asale ngaphandle amaculo uThandiswa adume ngawo njenge ‘Zabalaza’ ekwelinye lamaqoqo akhe nezobe ihlanganisa iminyaka engama-20 yaqoshwa.
“ISankofa ngolimi lwaseGhana isiTwi isho ukubuyela emumva uyolanda obekusele – nokungaba okubalulekile kuwe, okukunikeza inhlonipho nokudinga ukwelapheka. Kuyintokozo kimi ukwethula la manoni amasha nokuthokozela iminyaka engama-20 eZabalaza. Kimi lokhu kusho unyaka weSankofa,” kuphawula uThandiswa.
“Injabulo yami iyaphuphuma. Phela akusiyo into encane ukwenza into engiyithandayo iminyaka engama-20 selokhu ngafika kule ndima. Ngibonga kakhulu uthando nokwesekwa ngabalandeli. Ngiyathembisa ukuthi bazoyithokozela le khonsathi nakanjani.”
ISankofa Tour izobe iseThe Playhouse Opera Theatre, phakathi nedolobha eThekwini namuhla ebusuku ngehora lesi-8.