Umshushisi we-ICC ufuna kuboshwe abaholi bakwa-Israeli kanye nabe-Hamas
Umshushisi omkhulu we-International Criminal Court (ICC) ufake isicelo sokuthola incwadi egunyaza ukuboshwa kukaNdunankulu wakwa-Israeli uBenjamin Netanyahu kanye nomholi weHamas eGaza ngamacala empi.
UKarim Khan KC uthe kunezizathu ezizwakalayo zokukholelwa ukuthi womabili lamadoda anesandla kwamacala ezempi kanye nobugebengu obubhekiswe esintwini kusukela okungenani ziyisi-7 kuMfumfu wezi-2023.
UNgqongqoshe wezokuVikela kwa-Israeli u-Yoav Gallant kanye nomholi wezepolitiki we-Hamas u-Ismail Haniyeh, kanye nesikhulu samasosha kuleli qembu uMohammed Deif nabo amagama abo ayavela esicelweni sikamshushisi.
I-ICC, ezinze e-Hague, ibiphenya izenzo ze-Israel ezindaweni ezahlukunyezwa iminyaka emithathu edlule – futhi muva nje izenzo ze-Hamas ngokunjalo. Umengameli uNetanyahu muva nje ubize amathuba okuba abantu abaphezulu bakwa-Israeli bangene ohlwini lwabafunwa yi-ICC “njengechilo elikhulu emlandweni”.
Ungqongqoshe wekhabhinethi yezempi yakwa-Israel uBenny Gantz – oyimbangi yezepolitiki kaNetanyahu – usigxekile isinqumo somshushisi. “Ukufanisa phakathi kwabaholi bezwe elibuswa ngentando yeningi elizimisele ukuzivikela kubaholi benhlangano yamaphekula efuna igazi kuwukuhlanekezelwa okujulile kobulungisa kanye nokuqothuka okusobala kokuziphatha,” kubhala uNgqongqoshe enkundleni yokuxhumana u-X.
Isikhathi sokukhishwa kwezincwadi ezigunyaza ukuboshwa siyahluka, kuye kudlule amasonto ngisho nezinyanga phakathi nesikhathi umshushisi we-ICC asuke efake ngaso isicelo.
