ISundowns nabakwaBetway ezingxoxweni ezijulile
IMamelodi Sundowns isezingxoxweni nenkampani yokugembula iBetway.
ElaboHlanga lithole lezi zindaba ngomthombo walo ongashayi nangephutha eceleni ukuthi izingxoxo sezifinyelele kuvuthondaba phakathi kweSundowns nabakwaBetway.
Phambili iNational Soccer League (NSL) ibikade iwuvalile uphawini ezinkampanini zokubheja.
Njengamanje izinkampani zokugembula zingenisile ebholeni laseMzansi okufakazelwa wukubona amaqembu afana noCape Town City, iLamontville Golden Arrows, iKaizer Chiefs ne-Orlando Pirates esexhaswe yila mafemu.
“Izingxoxo phakathi kweSundowns nabakwaBetway sezikuvuthondaba. Sekushoda izinto ezincane ngaphambi kokuthi izinhlangothi zombili zivumelana,” kubeka umthombo waleli phephandaba.
Muva nje Amakhosi neZimnyama basanda kusayina isivumelwano nenkampani yokugembula iSuperSportBet.
Le nkampani isingabaxhasi abasemthethweni bokugembula neChiefs nePirates.
Ngakolunye uhlangothi Abafana Bes’thende sebexhaswe ngabakwa10Bet abaphinde babe ngabaxhasi beBafana Bafana.
ICape Town City ihamba nabakwaSportsPesa.
“UBetway ubuvele ufuna iqembu elikhulu eNingizimu Afrika. Empeleni ubugaqele iChiefs nePirates kodwa waphazanyiswa ngabakwaSuperSport. IBetway kubhekwe ukuthi ufake imali engaphezu kuka-R100 million ngesizini kuSundowns amasizini amathathu,” kuqhuba umthombo.
Phesheya kwezilwandle abakwaBetway baxhase i-Arsenal esembangweni wesicoco se-English Premier League.
Lapha eNingizimu Afrika bangabaxhasi bamaBhokobhoko, amaProteas, neCricket South Africa.
“ISundowns nabakwaBetway kubhekwe ukuthi benze isimemezelo uma kuphela isizini uma iNSL isiphasisa isicelo sabo. Isigungu esiphezulu kuNSL kuzomele sihlalele isicelo ngemuva kokusicubungula kumele sithathe isinqumo. Ngemuva kwalokho-ke, iSundowns ingenza isimemezelo,” kuphetha umthombo othembekile.
