Zilokhu ziqhakaze njalo izinkanyezi kwelomnqakiswano
Iqembu lebhola lomnqakiswano iKingdom Stars lasesifundazweni iKwaZulu-Natal lilokhu liqhubekile nokwenza kahle kuTelkom Netball League (TNL).
IKingdom Stars eqeqeshwa uPrecious Mthembu ngokubambisana noNompumelelo Mthembu, emidlalweni yokuqala emihlanu iyinqobe yonke.
Imidlalo yeTNL okuyisizini ye-11 iqale ngoLwesihlanu olwedlule e-Ellis Park, eGoli izoze isongwe mhla zili-19 kuNhlangulana.
Kowokuqala iKingdom Stars ihlule iTshukudu ngamaphuzu angama-53 kwangama-42, ilandeleke ngeTornado yayihlula ngama-41 kwangama-37, kwaba i-Eastern Cape Comets ngama-57 kwangama-41. Ilandele ngeSunbirds iyihlula ngamaphuzu angama-42 kwangama-33, namuhla ihlule iFree State Sonoblomo ngamaphuzu angama-60 kwangama-42.
Ukunqoba kwayo imidlalo emihlanu iKingdom Stars kuyenza ihlale phezulu ngamaphuzu ali-10.
Leli qembu elidliwe izembe nyakenye kubukeka lizimisele ukuphindela kuDivision 1, kule sizini leli qembu lidlala kuDivision 2 okuyisigaba esingaphansi.
Khonamanjalo iKingdom Queens eyiqembu lakhona KwaZulu-Natal izinto kuyona ziyabheda njengoba emidlalweni emine isanqobe umdlalo owodwa yahlulwa kwemithathu.
IKingdom Queens idlale neNW Tshukudu namuhla ngele-12 emini.
