UJohnson uchitha eyengxabano kubadlali beChiefs

Uchitha eyoqhekeko kubadlali beKaizer Chiefs umqeqeshi waMakhosi uCavin Johnson.

Ngeledlule kuke kwavela ukuthi abadlali beZimpofana baxabane bodwa ngemuva kokudliwa yiRichards Bay FC emdlalweni weligi obuseKing Zwelithini Stadium, eMlazi.

Ekhuluma nabezindaba ngemuva kokuqeda isinyama sokunganqobi emidlalweni emine, uJohnson uphikile ukuthi abadlali bakhe baxabane bodwa.

Ngempelasonto iChiefs iguqise iSuperSport United ngama-2/1 ePeter Mokaba  Stadium, ePolokwane, eLimpopo.

“Akulona iqiniso ukuthi abadlali bami baxabane bodwa. Ngicabanga ukuthi ngumuntu ovele wenza ihaba ngento engekho. Abekho abadlali abaxabane bodwa. Bebebonisana ukuthi bangenza kanjani kangcono ukuze bazibeke ethubeni lokwenza kangcono emidlalweni ezayo. Yebo, sibuyele emuva sayolungisa amaphutha ethu,” kubeka uJohnson.

Amagoli eChiefs ngempelasonto abhakuziswe enethini nguChristiane Saile noMduduzi Shabalala.

“Inkinga ebesibhekene nayo bekuyinkinga yamagoli. Sisebenze kanzima ejimini ukuyilungisa. Ngiyajabula ukuthi namuhla (ngoMgqibelo) sikwazile ukuthola amagoli amabili. USaile (Christiane) ushaye igoli ahlale elishaya ejimini. Kule midlalo eyedlule ubehluleka wukushaya igoli elifanayo. Kunesigaba lapho esivele sagxila khona ekushayeni ibhola ejimini. Uma ubheka igoli likaMdu kubeyigoli elihle futhi elisuka endleleni esizilungiselele ngayo ngaphambi komdlalo. Ngaphezu kwalokho ngiphinde ngathokozela ukuthi sikwazile ukushaya amagoli,” kuqhuba uJohnson.

Amakhosi abesedlale imidlalo emine ilandelana ehlulwa wukuthola igoli.

“Angikakhululeki. Sisalelwe yimidlalo emihlanu okumele senze isiqiniseko sokuthi siyidlala kahle siyinqobe. Ngicabanga ukuthi sesiwaphendulile amatafula. Kumele senze kangcono kakhulu emdlalweni olandelayo.” kuchaza uJohnson.

NgoLwesine, iChiefs izodudulana neMamelodi Sundowns emdlalweni weligi ozoqala lingamenxe ihora lesikhombisa eFNB Stadium, eNasrec, eGoli.