Ukunqoba emibili kwanele ukuba isicoco sibuyele eChloorkop
IMamelodi Sundowns isisalelwe ikuthi inqobe imidlalo emibili bese iyakwazi ukuvikela isicoco seDStv Premiership okwesikhombisa kulandelana.
Izolo kusihlwa leli qembu lasePitoli lihlule iSekhukhune United ngamagoli amabili kwelilodwa.
Amagoli eze noTashreeq Matthews ogcine eqokwa njengomdlali wosuku elesibili leza noThapelo Morena, eleBabina Noko (iSekhukhune United) lize noChibuike Ohizu.
Ukunqoba kweSundowns kuyenze yavula igebe lamaphuzu ali-13 kuStellnbosch FC esilele endaweni yesibili kulogi. Leli qembu eliqeqeshwa uRhulani Mokwena ngokubambisana noManqoba Mngqithi emveni kwemidlalo engama-22 linamaphuzu angama-56, iStellies yona emidlalweni engama-24 inamaphuzu angama-43.
Emidlalweni emibili elandelayo iSundowns ezoyidlala kuligi izotholana phezulu neKaizer Chiefs mhla zingama-30 kwephezulu bese mhla ziyisi-7 kuNhlaba ibhekane neRoyal AM.
Leli qembu libheke ukwenza umlando wokuthi kuphele isizini induku lingayazi nhlobo.
NgoLwesihlanu izodlala umdlalo onzima kakhulu ongowandulela owamanqamu eCaf Champions League, izotholana phezulu ne-ES Tunis yaseTunisia. Iya kulo mdlalo ilandela ngemumva ngegoli elilodwa, ehlulwe ngalo eTunisia ngeledlule.