Ngabe bazokwazi ukubhincisela nxanye
Kusukela kudala iSundowns ibilokhu iphethwe iziqumama futhi namanje kusenjalo ngoba ayide inqikaza uma ithenga abadlalali abanohlonze
Izinkunzi zamaqembu aseSoweto, i-Orlando Pirates neKaizer Chiefs zimatasa ziqinisa izikwati zawo ngabadlali abanonhlonze njengoba kuvulwe iwindi lokuhwebelana ngabadlali.
Ezimnyama nAmakhosi zimiswe kabi yiMamelodi Sundowns eqoqa kwasani okuyisicoco kulezi zinsuku.
IBrazilians isikhale yemuka nesicoco seligi amahlandla amahlanu kulandelana. Njengoba kuvulwe iwindi iChiefs nePirates baphansi phezulu.
Bobabili baqale ngokukhuculula uvucu ngemuva kwalokho base bememezela abadlali abasha.
IChiefs isayinise u-Ashley Du Preez, uZitha Kwenika, uYusuf Maart, uDillion Solomons, uKamohelo Mahlatsi, uSiyethemba Sithebe, noLehlogonolo Matlou.
IZimpofana zichithe izinsika zabadlali abafana noBernard Parker, uRamahlwe Mphahlele, uDaniel Cardoso, uDaniel Akpeyi, uLeonardo Castro, uSamir Nurkovic, u-Anthony Akumu Agay, uKearyn Baccus, uLebogang Manyama, uLazarus Kambole noSiphosakhe Ntiya-ntiya.
Ngakolunye uhlangothi iBhakaniya isayinise u-Eva Nga, u-Evidence Makgopa, u-Azola Mantrose noMiguel Timm. Ichithe uThulani Hlatshwayo, Wayne Sandilands, uJustice Chabalala, u-Abel Mabaso, uThabang Monare, no-Elson Sithole.
Intatheli yelaboHlanga ixoxe noqweqwe lomqeqeshi uFarouk Khan (FK) ukuhlaziya indlela izinkunzi zaseSoweto ezisayinise ngakhona nokuthi ngabe lokhu kusho ukuthini ngokucanasa kweSundowns. Ingxoxo yabo ihambe kanje.
Zipho Singela (ZS): Ngabe ukhithiza kwezinkunzi zaseSoweto, iChiefs nePirates kusho ukubuya kwezinsuku zenjabulo kula maqembu?
Farouk Khan (FK): Ngicabanga ukuthi womabili amaqembu aseyinise kahle kodwa ukusayinisa abadlali abaseqophelweni eliphezulu akusho ukuthi iqembu kusuke sekuqinisiwe ukuthi lizonqoba izicoco. Ngebhadi ebholeni akuhambi kanjalo. Ungasayinisa izibabuli zabadlali kodwa unganqobi lutho. Siyibonile into efuze leyo yenzeka emaqenjini adumile njengeManchester United.
Isayinise inqwaba yabadlali beqophelo eliphezulu futhi asebeke banqoba izicoco namazwe azo kodwa iMan United isahluleka wukubuyela ezingeni layo. Isitayela seqembu kumele lihambisane nangendlela iqembu elidlala ngayo. Lokho kumqoka. Yingakho iqembu kumele lakhe isitayela salo sokudlala bese lithola abadlali abazongena khaxa esitayeleni salo.
ZS: Yini ekuhlabe umxhwele ngendlela la maqembu amabili asayinise ngakhona?
FK: Iningi labadlali abasayiniswe yila maqembu amabili ngabadlali abanekhono kodwa futhi abancane ngokweminyaka. Ngabadlali abavelele emaqenjini abadlala kuwona. Njengamanje inselelo asebebhekene nayo wukutshengisa umgqigqo uma besenkundleni. Okunye okuhle ukuthi bayabizwa nasemaqenjini abo esizwe abadlala kuwo.
ZS: Usebenzile kuChiefs nakuPirates. Yini okufanele bayenze ukuze bakwazi ukumelana nengcindezi eza nokudlalela la maqembu?
FK: Indlela yokuziphatha imqoka. Phela ukusayina kula maqembu amabili kuhambisana nodumo. Bangakanani abadlali abasayiniswe yila maqembu benekhono kodwa bagcine bengafikanga ezingeni labo ngenxa yokuhluleka wukumelana nodumo? Yinqwaba. Ngicabanga ukuthi uma beyibambe lapho bese betshengisa umgqigqo azoba maningi amathuba okuthi babeyizilomo. Uma wenza kahle futhi uziphethe kahle uphenduka intandokazi kula maqembu.
ZS: Ingcindezi ingakanani kubaqeqeshi ekutheni bavele igebe phakathi kwabo neSundowns?
FK: Inkulu kakhulu. Sekuphele isikhathi la maqembu amabili agcina ukwenza kahle amasizini elandelana. Ngemuva kokusayinisa la badlali ababasayinisile abalandeli bazobafakela ingcindezi yezicoco. Bazofuna ukuthi baqale zisuka kuMTN8. Ngebhadi kuChiefs nakuPirates awusitholi isikhathi sokwakha. Kufunakala imiphumela nempumelelo. Yingakho amaqembu engene emakethe athenga abadlali abanohlonze.
ZS: IMamelodi Sundowns iyazicanasela. Lokho angeke sikuphike. Ngabe yini abayenza kahle futhi yimuphi umthwalo ohlalelwe yizinkunzi zaseSoweto ukuze sikwazi ukuvala igebe bese sibuyisa izinsuku zenjabulo?
FK: ISundowns kusukela kudala ibihlale iphethwe yiziqumama. Namanje kusenjalo. Lokhu kuyenza ikwazi ukuthenga abadlali abanonhlonze kuwona wonke amasizini. Ngaphambi kokuthi uPitso Mosimane nethimba lakhe labaqeqeshi bakhe isisekelo esiqinile kuSundowns nayo ike yabhekana nesimo lapho ibisayinisa bonke abadlali abaseqophelweni eliphezulu kodwa ihluleke wukunqoba izicoco. Ngaleso sikhathi bebebukeka bengenaso isitayela sokudlala esiqondile.
Bebesayinisa nje ngoba nakhu umdlali enza kahle. Lokho akuyiqinisekisi impumelelo njengoba bengishilo ekuqaleni kwenkulumo yethu. Elilodwa la lamaqembu aseSoweto lidinga okungenani ukunqoba iMTN8. Uma bengaqala kahle bangazithola beba nesizini entsha. NakuPirates kwaba ngesifanayo ngesikhathi sikaRuud Krol beqeda isomiso sezindebe. Abadingi ukuthatha iligi ukuze baqede ukucanasa kweSundowns. Uma benganqoba isicoco esisodwa kulezi ezimbili zemikhumulajezi bese bekhela phezu kwaso kancane kancane izinsuku zenjabulo zizobuya. ISundowns isiyakhe isisekelo esiqinile. Angeke bekwazi ukuyiqumba phansi ngonyaka owodwa.
ZS: Kuthini ukuphawula kwakho ngokudedelwa kwezinsika zabadlali kwawaseSoweto?
FK: Ngicabanga ukuthi bese kuyisikhathi. Bahlale isikhathi eside iqembu lingenzi kahle, ikakhukukazi ohlangothini lweChiefs. KuPirates iningi labo alizange lenze umehluko elalisayiniselwe wona.
ZS: Sibonge ngesikhathi sakho.
FK: Ngibonge nami ngethuba
