UBellingham unxusa iziphathimandla ukuba ziqinise isandla ngokucwasa
Umdlali wasesiswini weReal Madrid ne-England uJude Bellingham uthi iziphathimandla zebhola emhlabeni kumele kube khona ezikwenzayo ngendaba yokucwasana ngobuhlanga.
Lo mdlali uthi le nto isithathe isikhathi ukwenzeka, ingakho engabaza ukuthi kuzokwenza lokhu akufisayo.
Usho lokhu nje uzakwabo adlala naye kuReal Madrid odabuka eBrazil uVinicius Junior, usanda kukhihla esikaNandi ngakho ukucwaswa ngokobuhlanga.
NgoMbasa iReal Madrid yafaka isikhalo kuziphathimandla zezomthetho zaseSpain ngemuva kwezinsolo zokucwaswa kwalo mdlali.
“Kuyinto ecasilayo lena eyenzakalayo. Akufanele ingabe iyenzeka. Iziphathimandla kumele kube khona ezikwenzayo ngempela. Le nto ihlukumeza kakhulu ngoba umdlali sekumele adlale emincile ngoba akazi noma lesi sehlo sizomehlakalela yini,” kusho uBellingham.
Emdlalweni odlule u-Aurelien Tchouameni wayo iReal Madrid uthole ukucwaswa ngesikhathi leli qembu libhekene neMallorca koweligi.
UVinicius uza waveza ukuthi luyehla uthando lwakhe lokudlala eSpain, ngenxa yalezi zinto ezilokhu zimehlakalela ngoba usehlukunyezwe izikhathi eziningana.
IReal Madrid namuhla izovovana inkani neqembu lase-England iManchester City kowe-Uefa Champions League.
Lona ngumdlalo womlenze wesibili, emlenzeni wokuqala waphela zibambene ngamagoli amathathu.
