Usuku Lwabesimame luhlomulise awaseKZN nawaseGauteng
Igcagcele esokeni emacikweni aKwaZulu-Natal naseGauteng egidlabezwa ngezigidi ezili-R10.
Lokhu kuvele emcimbini wokwethula umkhankaso wabezindaba lapho bekuphinde kubungazwe uSuku Lwabesifazane Lwamazwe Ngamazwe olubungazwa ngaphansi kokuhlelwa umhlabuhlangene, i-United Nations.
Abaphisi botshwala iDiageo SA baqashe amaciko adwebayo ukuba adwebe izindonga eMlazi naseSoweto ukubungaza lolu suku.
Udonga lasekungeneleni efekthri yale nkampani eseProspecton lupendwe nguNtethelelo Mncwango. Le ntokazi ingeyokudabuka eMtubatuba enhla neKwaZulu Natal. Okhulumela abakwaDiageo, uMasego Tsheoletsane, uthe: “Imboni yezokukhangisa ilishashalazi elikhulukazi elingasetshenziselwa ukuphakambisa abesifazane nezinto abazenzayo ezidinga ukuxhaswa.”
Ukuba yingxenye yalo mkhankaso kumthokozise kakhulu uNks Ntethelelo Mnwango. “Njengomuntu oqhamuka endaweni yasemakhaya, ngilwazi kahle usizi lwabesifazane nxashana befisa ukukhombisa amava abo ngokuphelele. Lo mkhankaso awugcini nje ngokukhombisa ukungethemba kepha uphinde ungichome uphaphe legwalagwala. Okubaluleke nakakhulu ngukuthi imilomo iyavunana ukuthi ezobuciko ziyindlela enqala yokudlulise imiyalezo ebalulekile. Angithi vele amaciko anemvume yokubeka umongo womphakathi ngendlela awubona ngayo,” kusho uNks yakwaMncwango.
Usuku lokubungaza isibhuda eNingizimu AFrika, okungumhla ziyisi-9 kuNcwaba lunomlando ofanayo nosuku lwesibhuda lwamazwe ngamazwe. OlwaseNingizimu Afrika lwasuselwa kunhlabaluhide eyenzeka ngowe-1956, kanti olwamazwe ngamazwe lwasukela kunhlabaluhide eyenzeka eNew York e-USA ngowe-1908.