UMphathi useyophatha ezokuqeqesha ku-Arrows
Ibuyise uSteve Komphela iLamontville Golden Arrows ebhedelwa yizinto kuDStv Premiership.
Leli qembu selidliwe imidlalo eyishumi nanye ilandelana kuyo yonke imiqhudelwano.
UMabhuti Khenyeza nguyena obeshayela iqembu. Uzokwehliselwa esikhundleni sokuba yisikela likaKomphela.
NgoLwesibili, Abafana Bes’thende baguqiswe yiKaizer Chiefs ngelilodwa eqandeni emdlalweni weligi obuseFNB Stadium, eNasrec, eGoli.
Igoli lokunqoba leChiefs libhanjiswe ezintanjeni nguWandile Duba. I-Arrows selokhu yagcina ukunqoba umdlalo ngoMfumfu ngesikhathi iqumba phansi iChiefs ngama-2/1 eMpumalanga Stadium.
Kusukela lapho iphenduka ukudla kwenduku kweyeligi, Carling Knockout Challenge neNedbank Cup.
UKomphela usanda kuhlukana neMoroka Swallows ebhekene nenkinga yemali. Ushiye kuleli qembu ngenyanga eyedlule.
Ubelijoyine esuka kuMamelodi Sundowns ayilaxaze ekupheleni kwesizini eyedlule. Ku-Arrows kufana nokuthi kusekhaya ngoba useke wasebenza kuleli qembu.
Abafana Bes’thende baqinisekise izindaba zokubuya kukaKomphela ezinkundleni zokuxhumana.
