Ayinuki ingosiwanga: uMengameli neSikhulu Esiphezulu kuSafa bachitha izinsolo
ISouth African Football Association (Safa) ichitha amahebezi asanda kusabalala ngoMengameli wale nhlangano uDanny Jordaan neSikhulu Esiphezulu uLydia Monyepao.
Ngempelasonto kusabalale izinsolo zokuthi uJordaan uphethe iSikhulu Esiphezulu uManyepao ngesandla sensimbi esikhundleni sakhe.
Kuvele amahhebezi okuthi uJordaan ugxambukela emsebenzini kaManyepao futhi ufuna kwenzeke ngendlela yakhe. Lokhu kuthiwa sekuholele ekutheni uManyepao afune ukushiya kulesi sikhundla ngenxa yokungaphatheki kahle emsebenzini wakhe.
ISafa isikhiphe isitatimende lapho ihlabe yahlikiza khona lezi zinsolo ithi zingamampunge.
“ISafa isiyobonile imizamo yokudicilela phansi impumelelo yeBafana Bafana neBanyana Banyana kanjalo nomkhankaso wokuphazamisa izinhlelo zala maqembu azokuzibekisela indawo eNdebeni YoMhlaba yangowezi-2026 nakuma-Olympic Games eParis kwelaseFrance ngonyaka ozayo. IBafana izoba yingxenye yemidlalo yesihle ngaphansi kohlelo lweFifa e-Algeria kusukela mhla ziyishuminesishiyagalombili kuNdasa kuze kube umhlaka zingamashumi amabili nesithupha kwephezulu,” kuchaza isitatimende.
UMonyepao uthathe lesi sikhundla ngemuva kokuhamba kukaTebogo Mothlante.
“Kunodaba esifisa ukukhuluma ngalo okuthinta iSikhulu Esiphezulu uLydia Monyepao. UNkosazana uLydia Monyaepao noDokotela uDanny Jordaan bafuna ukukucacisa ukuthi bayazichitha izinsolo zokuthi uMonyepao ufuna ukushiya esikhundleni sakhe futhi umiswe kabi nguJordaan emsebenzini wakhe. Lezi zinsolo bobabili bayazichitha futhi bazifanisa nomgosi,” kuqhuba isitatimende.
UMonyepao ukubeke kwacaca ukuthi alukho uqhekeko phakathi kwakhe noJordaan.
“Mina noMengameli sinobudlelwano obuhle nokusebenzisana,” kulandisa uMonyepao.
UJordaan noMonyepao bebendawonye muca nje kwelase-Ivory Coast lapho bebedingida khona izinhlelo zeBafana Bafana neBanyana Banyana. Baphinde bahlangana nasosukwini lwayizolo.
