UMadlokovu ubona uSuthu lufanele ukuwunqoba oweligi
Injini yaMazulu FC uCelimpilo “Zidane” Ngema uthi kumele bavuke bazithathe emdlalweni wabo olandelayo.
USuthu kolandelayo luzotholana phezulu neSekhukhune United koweDStv Premiership, lo mdlalo uzokuba kusasa eKing Zwelithini Stadium, eMlaza.
“Sihlulwe emdlalweni emibili kuligi ilandelana, manje lo mdlalo wethu neSekhukhune United kumele nakanjani siwunqobe. Ukunqoba kwethu kuzosisiza ukuthi sikhuphukele phezulu” kusho uNgema.
Emidlalweni emibili edlule koweligi uSuthu luhlulwe iCape Town Spurs ebukeka yenza kahle mumva nje, ngeledlule ibhaxabulwe ompetha beDStv Premiership iMamelodi Sundowns.
Ebuzwa ngokwenza kahle uma bedlala ekhaya uthe: “Kulo nyaka sidlale imidlalo emibili ekhaya senza kahle, ngalokho siyacela abalandeli bephume ngobuningi bezosiseka ukuze sizokwazi ukwenza kahle enkundleni yethu,” kubeka uNgema.
Kulogi uSuthu luhlezi endaweni ye-11 lunamaphuzu angama-22 emva kwemidlalo eli-18.
Eminye imidlalo ekhona yeDStv Premiership kusasa oweCape Town City neStellenbosch komunye kube oweKaizer Chiefs neLamontville Golden Arrows.
