Umdlalo oseHilton ungacacisa inkunzi yeQoqo B ku-ABC Motsepe
Kulindeleke ukuthi kuguge utshani uma sekutholene phezulu amaqembu amabili uMkhambathi FC neDrakensburg FC, emdlaweni weligi iSafa – ABC Motsepe League esifundazweni iKwaZulu-Natal.
Okuzokwenza ukuthi ushube kakhulu lo mdlalo ingoba, la maqembu asembangweni wokunqoba iqoqo.
UMkhambathi FC waseMkhambathini iwona ohlezi phezulu eqoqweni B, emva kwemidlalo eli-12 unemidlalo engama-29, kuthi iDrakensburg FC yaseMnambithi ibe namaphuzu angama-28 nayo enemidlalo eli-12.
Lo mdlalo uzokuba kusasa ngoMgqibelo eHilton College libumbene ihora lesithathu ntambama.
UNkosingiphile “Dimco” Ntinga oqeqesha uMkhambathi FC, uthe bafuna nakanjani ukuwunqoba lo mdlalo ukuze bavule igebe.
“Iqembu lethu lidlala kahle kakhulu inkinga ukuthi sikhanda amathuba amaningi kakhulukazi ngesiwombe sokuqala sigcine singawasebenzisi. Ngeledlule bekumele siwushintshise ngamagoli amane umdlalo sibhekene neFriends, kodwa sagcina sinqoba ngamagoli amabili angena ngesiwombe sesibili. Emalungiselelweni ethu sisebenze kakhulu kukhona ukushaya amagoli. Umdlalo omqoka lona sifuna ukuvula igebe” kusho uNtinga.
Kumlenze wokuqala lamaqembu etholene phezulu uMkhambathi FC wanqoba ngamagoli amabili eqandeni.
Kuqoqo A nakhona umbango ushubile phakathi kweNjampela FC noMkhumbane Classic.
INjampela FC yaKwaNongoma ihlezi phezulu ngamaphuzu angama-31 emva kwemidlalo eli-12, uMkhumbane Classic waseThekwini wona unamaphuzu angama-25 emidlalweni eli-11.
UMkhumbane Classic ubheke ukuthi unqobe icala lawo neStone Breakers, njengoba bebedlala ngempelasonto edlule umdlalo wagcina ungaphelanga.
UKwenza Ngwenya ongumengameli weSafa esifundazweni iKwaZulu-Natal, utshele elaboHlanga ukuthi lelicala lizohlala phansi ngesonto elizayo.
Isiyonke imidlalo ye-Safa ABC Motsepe League KZN kule mpelasonto ihlelwe kanje:
Iqoqo A:
Namuhla:
- IDlangezwa Hellenic Football Club ne-Asande Football Club, eMpangeni Rugby Stadium ngele-13:00.
Kusasa:
- iNjampela FC neMidlands Wanderers FC, ePrince Mangosuthu Stadium ngele-12:00.
- iSummerfield Dynamos FC ne-Oyzn Academy FC eChatsworth Road 1016 ngele-15:00.
- iDurban Pioneers FC noMkhumbane Classic
- eKing Zwelithini Outer Fields, ngele-15:00.
- iMuzi King Masters FC neStonebreakers FC eDarnal Soccer Field ngele-15:00
Iqoqo B:
Kusasa:
- iRemax Address Friends FC ne-Ethekwini Coastal F.C, Edgewood Campus Ground ngele-12:00.
- UMkhambathi FC neDrakensburg FC
- eHilton College Field ngele-15:00
- iSwayimane United FC ne-UMsinga United FC, Wartburg Stadium ngele-15:00
- iTitanic FC ne-Umvoti Football Club
- Umkomaas Bisset Stadium ngele-15:00
- iNewcastle All Stars FC neCHESS F.C
- e-Arbor Park Stadium ngele-15:00.
