ElaseThekwini ethubeni lokuba ngompetha beBetway SA20 League
IDurban Super Giants idlulele kowamanqamu weBetway SA20 League ngemuva kokuqumba phansi iJoburg Super Kings izolo ebusuku eWanderers Stadium, eGoli.
Leli qembu laseThekwini liqede endaweni yesibili ku-log emidlalweni yamaqoqo. Kowokuhlungela ukuzibekisela indawo kowamanqamu liqhathwe neSunrises Eastern Cape eqede eyamaqoqo iqhwakele.
La maqembu amabili atholane phezulu eNewlands Cricket Ground, eKapa. Abavikeli nesicoco iSunrises inqobe ngama-run angu-51 kulo mdlalo base bedlulela kowamanqamu.
Lokhu kusho ukuthi iSuper Giants kuzomele iphinde izame okwesibili kozonqoba phakathi kwePaarl Rocks neJoburg Super Kings.
AmaRocks aqede endaweni yesithathu kwathi iSuper Kings yayibamba endaweni yesine. Womabili la maqembu abelwela indawo kowandulela amanqamu alo mqhudelwano.
Abelindwe yiDurban Super Giants. ISuper Kings igcine iguqise iPaarl Rocks ngamawikhethi ayisishiyagalolunye yase izibekisela indawo kowandulela amanqamu.
Izolo la maqembu abebanga indawo kowamanqamu emdlalweni obuseWanderers.
ISuper Kings ebidlalela ekhaya inqobe ithosi yashwiba kuqala. ISuper Giants ihlanganise ama-run angama-211 kusawe amawikhethi ayisithupha kuma-over angamashumi amabili.
Bekubhoke uHeinrich Klaasen obeke ebhodini ama-run angama-74 emabholeni angama-30. UWiaan Mulder ugcine engaphumanga enama-run angama-50 emabholeni angama-23.
UNandre Burger uthathe amawikhethi amabili ngokubambisana noDoug Bracewell. Amanye athathwe nguDayyaan Galiem noSam Cook.
ISuper Kings ihluleke yancama wukujaha lesi sibalo sama-run angama-211. Iphume yonke seyenze ama-run ali-142 kuma-over ali-17.4.
UJunior Dala ubengazibekile phansi. Uthathe amawikhethi amane kwathi uDwaine Pretorius noNaveen-ul-Haq bangingqa amabili. UReece Topley noMulder bathathe iwikhethi eyodwa umdlali ngamunye.
ISuper Giants inqobe ngama-run angu-69. NgeSonto ngo-5.30 ntambama izodudulana neSunrises Eastern Cape kowamanqamu eNewlands Cricket Ground, eKapa.
