Now Reading
Iziqhwaga zeTheku zixhoshwe yilanga eKapa kowekhrikhethi
Dark Light

Iziqhwaga zeTheku zixhoshwe yilanga eKapa kowekhrikhethi

Isale incela izithupha iDurban Super Giants (DSG) ngesikhathi iqunjwa phansi yiSunrises Eastern Cape emdlalweni owandulela amanqamu eBetway SA20 League izolo ebusuku eNewlands Cricket Ground, eKapa.

U-Aiden Markram uwine ithosi iSunrises yakhetha ukubhetha kuqala. Ibeke ama-runs ali-157 kusawe amawikhethi ayisishiyagalombili kuma-over angamashumi amabili.

UDawid Malan umuhluze ama-runs angama-3 emabholeni angama-45 kwathi uMarkram wahlabana nangama-30 emabholeni angama-23.

Amawikhethi eSuper Giants athathwe nguKeshav Maharaj noJunior Dala abawise amabili. UDwaine Pretorius noNaveen-ul-Haq bathole eyodwa umdlali ngamunye.

Amanye amabili kube ngama-run out kaHeinrich Klaasen noWiaan Mulder. La maqembu amabili abebanga indawo kowamanqamu. 

ISunrises iqede esicongweni kweyamaqoqo ngamaphuzu angama-33 ngemuva kwemidlalo eyeshumi. Ngakolunye uhlangothi iSuper Giants iyibambe endaweni yesibili ngamaphuzu angama32 ngemuva kwemidlalo efanayo.

Iqembu laseThekwini livele lagwiliza eKapa kwazise likhishwe lonke selenze ama-run ali-106 kuma-over ali-19.3.

ISunrises izibekisele indawo kowamanqamu uzodlalwa ngeSonto ngo-5.30 eNewlands Cricket Ground.

See Also

ISuper Giants isenalo ithuba lokudlala kowamanqamu. NgoLwesine ngo-5.30 eWanderers Stadium, izobhekana nozonqoba namuhla phakathi kwePaarl Rocks neJoburg Super Kings.

IPaarl Rocks neSuper Kings bazotholana phezulu namuhla ngo-5.30 eWanderers.

UMarco Jansen no-Ottniel Baartman yibona abaqede nya ngeSuper Giants izolo ebusuku. Bobabili bathathe amawikhethi amane. Amabili abathwe nguLiam Dawson.

Scroll To Top