Angaqopha umlando kowe-Afcon uWilliams

Unozinti ophinde abe ukaputeni weBafana Bafana usethubeni lokuzifaka emabhukwini omlando

URonwen Williams emidlalweni emine ye-Africa Cup of Nations (Afcon), ungenelwe amagoli amabili nakhona emdlalweni owodwa.

Emidlalweni emithathu akangenelwanga goli.

Ukungangenelwa goli emidlalweni emithathu kulo mqhudelwano kunozinti walapha eNingizimu Afrika, kwagcina ngo-Andre Arendse ku-Afcon eyabe ikuleli ngonyaka we-1996. 

U-Arendse wagcina eqophe ukungangenelwa goli imidlalo emine kuleyo Afcon, eyagcina inqotshwe iyona iBafana Bafana eyayiqeqeshwa uClive “The Dog” Barker ongasekho emhlabeni.

Kuwona wonke umqhudelwano wangenelwa amagoli amabili kuphela. 

Emidlalweni uWilliams angangenelwanga goli kuyona oweNamibia, iTunisia  kweyamaqoqo kwaba oweMorroco wona obekowe-Last 16.  

Lo nozinti oneminyaka yobudala engama-32 kulindeleke ukuthi aqhubeke nomgqigqo wakhe omuhle uma iBafana Bafana isibhekene neCape Verde kowequarter-final, ozokuba ngoMgqibelo ngele-10 kusihlwa. 

Okubukeka kuyikho okwenza uWilliams enze kahle ukuthi emumva kudlala abadlali beMamelodi Sundowns asejwayele ukudlala nabo lokho kwenza engabibikho amaphutha amaningi. 

UWilliams akuyena yedwa ongangenelwanga goli imidlalo emithathu kulo mqhudelwano kusukela uqalile, omunye uStainley Nwabili waseNigeria ovimbela iChippa United edlala kuDStv Premiership.