I-UAE ihlelembele isivumelwano ngeziboshwa eRussia nase-Ukraine
Emuva kweminyaka emibili yokubhekana ngeziqu zamehlo amazwe ayinkukhu nempaka iRussia ne-Ukraine sebevumelene ukushintshisana ngeziboshwa nhlangothi zombili. Yize lokhu kungekhona okokuqala, isimemezelo sala mazwe yize singasho ukuphela kwempi kepha sinike ithemba lokuthi azikavaleki zonke izindlela zokuxhumana. Ngokusho kukaMengameli wase-Ukraine, uZelensky zingama-270 iziboshwa abazamukelile. Uthe zisuka eminyakeni engama-20 kuya kwengama-61.
Ngakolunye uhlangothi iRussia ibike ukuthi iziboshwa zempi ezi-195 zibuyele ekhaya. Kulezi zibalo kube nokuphikisana njengoba iRussia ithe nayo ibuyisele isibalo esifanayo hayi lesi ebesishiwo nguZelensky. Kwenzeka konke lokhu ngesonto eledlule iRussia isole i-Ukraine ngokudubula ibhanoyi ebelithwele iziboshwa zase-Ukraine ezingama -65.
Kuvelile ukuthi lesi sivumelwano sakamuva senziwe yi-United Arab Emirates (UAE) esondelene kakhulu neRussia. Yize kusanokuphikisana ngokudutshulwa kwebhanoyi, uMengameli wase Russia uveze ukuthi uphenyo luveza ukuthi kusetshenziswe isikhali saseMelika. Ubuye wathi kakuqondakali ukuthi abase-Ukraine bebeqondile yini ukudubula ibhanoyi elinabakwabo.
Abase-Ukraine ngomlomo kaMnu uKyrlo Budanov wophiko lezobunhloli basho okunye. Uthe bayokholwa mhla babona izidumbu zalabo okuthiwa bafile ngoba okwamanje iRussia ayikazikhiphi.
