Kuntwela ezansi kuSunrises
Ivuselele amathemba okuvikela isicoco sayo iSunrises Eastern Cape iqumba phansi iJoburg Super Kings ngamawikhethi ayisishiyagalolunye emdlalweni weBetway SA20 League obuseDP World Wanderers, eGoli izolo ebusuku.
ISuper Kings ikhishwe yonke ngehlazo lama-run angama-78 kuma-over ayi-15.2. Abavikeli besicoco iSunrises ibidinga ama-run angama-79 ukuze iphumelele kulo mdlalo.
Iwahlanganise kalula ngaphandle kwezinkinga. Kuyithathe ama-over ayishumi nanye ukujaha ngempumelelo le nkeshezi yama-run abekwe yileli qembu laseGoli elidonsa kanzima.
ISunrises inyukele endaweni yesibili ku-log. Isiqoqe amaphuzu angama-24 emidlalweni eyisishiyagalombili. Isele ngamaphuzu ayisishiyagalombili kuSuper Kings eqhwakele ku-log.
Isizobhekana nePaarl Rocks eKapa bese iyivale neqembu elifanayo ekhaya.
Kusasa izovakashela amaRocks eBoland Park, eKapa ngelesi-5.30 ntambama bese kuthi ngeSonto ngelesi-3.30 ntambama ishukane neqembu elifanayo eSt George’s Park, eGqeberha.
Leli qembu lase-Eastern Cape liqinisekise indawo kowandulela amanqamu kulandela ukuphumelela umdlalo wayizolo.
Njengamanje selizolwela ukuqeda endaweni yesibili ukuze lidlalele umdlalo owandulela amanqamu enkundleni yalo yasekhaya.
Osukwini lwayizolo, iSunrises iwine ithosi yaqoka ukushwiba kuqala. Isinqumo sayo siyisebenzele. KuPower-play yokuqala ithathe amawikhethi amane.
Ikhiphe uFaf Du Plessis, uReeza Hendricks, uLeus du Plooy noMoeen Ali. UDu Plessis, u-Ali noHendricks baphume ngamadada kwathi uDu Plooy wakhishwa enama-run ali-18.
UWayne Madsen uyena ogcine eshaya ama-run abonakalayo kuSuper Kings. Uhlanganise angama-32.
Ngasohlangothini lweSunrises bekubhoke uDaniel Worrall noPatrick Kruger bobabili abathathe amawikhethi amathathu umdlali ngamunye. UMarco Jansen noBeyers Swanepoel bathole amabili.
Ngemuva kwalokho leli qembu libe selingena enkundleni lizojaha lesi sibalo sama-run.
Lilahlekelwe yiwikhethi eyodwa kuphela. Nge-over yesihlanu, uLizaad Williams ukhiphe uJordan Hermann. UDawid Malan noThomas Abell yibona abaweze iSunrises ngelibanzi.
Bobabili abazange bakhishwe. UMalan ushaye ama-run angama-40. Wesekwe ngu-Abell ozitholele angama-26.
