Elesizwe lakuleli lizimisele ngokuyiqumba phansi iBangladesh
IProteas isethubeni elihle lokuvala igebe phakathi kwayo ne-Australia embangweni wokuba ngompetha bomhlaba emidlalweni yamaTest.
Njengamanje iProteas ihlezi endaweni yesibili ekuklelisweni kwamazwe emidlalweni yamaTest.
Isiqoqe amaphuzu angama-48 emidlalweni eyisithupha. Isele ngamaphuzu angama-24 kuma-Aussies aqhwakele ngamaphuzu angama-72 esicongweni.
IProteas ihamba phambili ngo-1/0 ochungechungeni lwemidlalo emibili yamaTest ephakathi kwayo neBangladesh.
Inqobe ngo-1/0 emdlalweni wokuqala weTest obuseHollywoodbets Kingsmead, eThekwini. Namuhla izoqala umdlalo wokugcina eSt.George’s Park, eGqeberha.
Uma inqoba izohlomula ngamaphuzu ali-12 okusho ukuthi izonyukela emaphuzwini angama-60. Lokhu kuzokwenza ishiyane ngamaphuzu ali-12 ne-Australia.
IProteas ibonakala iwuthola umgqigqo emidlalweni yamaTest. Ekuqaleni konyaka iqumbe phansi elaseNdiya ngo-2/1. Kuthe kusenjalo yabambana ngo-1/1 neNew Zealand ekuhambeni njengoba isahamba phambili ngo-1/0 kuBangladesh.
Ukaputeni weProteas utshele abezindaba ngaphambi komdlalo wesibili wezakhe neBangladesh ukuthi ufuna babhethe ngesinono.
“Emdlalweni wokuqala asizange sibhethe kahle ku-Innings yesibili. Ngikholwa wukuthi besingenza kangcono. Indlela yokuzinikela kuzomele iguquke uma sesibhetha. Silahlekelwe ngamawikhethi amaningi ngendlela engenasidingo. Lawa ngamawikhethi ebesingawagwema,” kubeka u-Elgar.
Emdlalweni wokuqala akekho umdlali weProteas ohlanganise ikhulu lemigijimo.
UTemba Bavuma wenze imigijimo engama-93 kwathi u-Elgar wahlanganisa imigijimo engamashumi amahlanu kuwona womabili ama-Innings.
“Anginaso isiqiniseko sokuthi iSt.George’s Park izosiphatha kanjani. Engikwaziyo wukuthi inkundla yakhona yinhle kulezi zinsuku. Sizoyihlelela ngendlela,” kuqhuba u-Elgar.
UKeshav Maharaj noSimon Harmer yibona abanqobele iProteas umdlalo wokuqala.
Laba bashwibi abajikijela amabhola ohlobo lwespin bathathe amawikhethi ali-14 kwangama-20 awele kuProteas.
Umdlali ngamunye uthathe amawikhethi ayisikhombisa.
“Kuyajabulisa ukubona abashwibi bohlobo lwe-spin benza kahle. Lokhu kuzokwenza iqembu lethu liqhubeke nokudlondlobala. Bobabili bangabadlali abaseqophelweni eliphezulu. Babambe elikhulu iqhaza empumelelweni yeqembu. Sibheke ukuthi baqhubeke nokufaka isandla empumelelweni yeqembu emidlalweni ezayo,” kuchaza u-Elgar.
IProteas idlala ngaphandle kwezihlabani zabadlali abafana noKagiso Rabada, uMarco Jansen, uRassie Van Der Dussen, u-Adien Markram noLungi Ngidi.
“Silwile sonke njengeqembu. Okuhle wukuthi siqale kahle kulokhu. Ngesikhathi sibhekene nelaseNdiya saqala ngebatha. Kube yinto efanayo sidlala neNew Zealand. Njengamanje esesikubhekile wukuqhubeka nomgqigqo esiqale ngawo,” kulandisa u-Elgar.
ULutho Siphamla angase athole ithuba kulo mdlalo wokugcina. Kubhekwe ukuthi athathe indawo kaWiaan Mulder osazabalaza namanje ukufinyelela ezingeni elibhekwe kuyena.
USiphamla uyazi kangcono inkundla yaseGqeberha kwazise ukhulele khona edlala kuWarriors ngaphambi kokuthi ajoyine iLions yaseGoli.
UMulder udlala kuProteas njengojikelele kodwa uhluleke kuwona womabili ama-Innings ukwenza imigijimo nokuthatha amawikhethi.
UHarmer nguyena ongase anyuselwe endaweni yokubhetha endaweni yesishiyagalombili.
“Isimo senkundla yisona esizosicacisela ukuthi kufanele siqoke iqembu elinjani elizobhekana neBangladesh emdlalweni weTest yesibili,” kusho u-Elgar.
Ngemuva kwemidlalo emibili yamaTest neBangladesh elakuleli lizobhekana namaNgisi khona kwelikaQueen ngoNcwaba emidlalweni emithathu.
“Ngikholwa wukuthi kuningi esikufunde emdlalweni wokuqala esifuna ukwakhela kukona njengoba sibheke emdlalweni wesibili. Abadlali abasha eqenjini babukeka beluthola uzinzo. Umdlalo wokuqala asiwunqotshelwanga nje ngabadlali abali-11 abaqale umdlalo, kodwa isikwati sonke sibe neqhaza ekuphumeleleni kwethu. Ithimba labaqeqeshi akumele silishiye ngaphandle.” kuphetha u-Elgar.
