IDurban Super Giants izibekisele indawo kowandulela amanqamu
Iqinisekise indawo yayo kowandulela amanqamu iDurban Super Giants (DSG) ithela othulini iPretoria Capital eKingsmead Cricket Stadium izolo ebusuku ngama-runS ayisishiyagalombili.
Leli qembu laseThekwini liwine ithosi laqoka ukubhetha kuqala kulo mdlalo. Lihlanganise ama-run ali-174 kusawe amawikhethi ayisishiyagalolunye kuma-overs angama-20.
Bekubhoke uMatthew Breetkze, Heinrich Klaasen noJon Jon Smut. UBreetzke ugcine eqokwe njengomdlali ovelele kulandela ukushaya ama-runs angama-73 emabholeni angama-46.
Wesekwe nguKlaasen okhishwe enama-run angama-30 emabholeni ali-18 kwathi uSmut wagcine engaphumanga enama-run angama-21 emabholeni ali-17.
UDaryn Dupavillion noSenuran Muthusamy benze isiqiniseko sokuthi iSuper Giants ayibaleki ngesikhulu isivinini. Bobabili bathathe amawikhethi amathathu. U-Adel Rashid, Wayne Parnell noWill Jacks bonke bathole iwikhethi umdlali ngayedwa.
UJunior Dala wenze ezibukwayo sekushwiba iSuper Giants. Usize leli qembu laseThekwini lavikela isibalo salo sama-run ali-174 ngempumelelo. UDala uthathe amawikhethi amahlanu. UWiaan Mulder, Naveen-ul-Haq noNoor Ahmed bathole iwikhethi umdlali ngayedwa.
IPretoria Capital igcine ishode ngama-run ayisishiyagalombili. Ihlanganise ama-run ali-166 kuma-over angama-20. Ilahlekelwe ngamawikhethi ayishiyagalolunye.
ISuper Giants igcine inqobe ngama-run ayisishiyagalombili. Isiqhwakele ngamaphuzu angama-32 emidlalweni eyisishiyagalolunye. Ivule igebe lamaphuzu ayishumi kuPaarl Rocks eyibambe endawni yesibili.
Leli qembu laseThekwini liphinde laqinisekisa indawo yalo kowandulela amanqamu. Lizodlalela ekhaya.
