Ugcobho ekuthengweni kwezikhali e-Ukraine
Uphiko lwezokuphepha e-Ukraine i-SBU lubike ukuthi seluvumbulule uhlelo lwenkohlakalo ekuthengweni kwezikhali. Ngokombiko inkohlakalo lena ilinganiselwa ezigidini ezingama-$40.
Lombiko ubukeka uzoza nokukhuluma ezweni kanjalo nakumazwe asetshonalanga okuyiwo aseka i-Ukraine ngemali nezikhali. Okunye okungahle kube yinkinga ngalombiko yisicelo se-Ukraine sokuba yilungu eliphelele le European Union.
I-SBU ithe uphenyo “ludalule izikhulu zoMnyango Wezokuvikela kanye nabaphathi benkampani ethengisa izikhali i-Lviv Arsenal.
“Ngokophenyo, izikhulu zangaphambili nezikhona njengamanje ezisezikhundleni eziphezulu zoMnyango Wezokuvikela kanye nezinhloko zezinkampani ezisebenzisana nazo ziyabandakanyeka ekukhwabaniseni imali.”
Lokhu kukhwabanisa kuvela ukuthi kuthengelwe umbutho amagobolondo ensimbi( shells) ayizi-100 000. I-SBU ithe inkontileka yamagobolondo yatholwa iLviv Arsenal ngoNcwaba wezi2022 – izinyanga eziyisithupha impi isiqalile – futhi inkokhelo yenziwa kusenesikhathi, enye imali yadluliselwa phesheya.
Kodwa azikho izikhali ezake zalethwa, kusho isitatimende, kanti ezinye izimali zabe sezithuthelwa kwamanye ama-akhawunti angaphandle.
Isitatimende sithe abantu abahlanu banikezwe “izaziso zokubasola” – okuyisigaba sokuqala ezinkantolo zezomthetho zase-Ukraine – okuhlanganasi abantu bomnyango kanye nabaphakeli bezikhali. Umsolwa oyedwa, kuvele ukuthi, uboshwe ngesikhathi ezama ukuwela umngcele wase-Ukraine.
Inkohlakalo ngaphakathi kwezempi ibe yinkinga ebucayi ikakhulukazi e-Ukraine njengoba izama ukugcina isimilo somphakathi ngesikhathi sempi futhi yethula udaba lwayo lokujoyina i-EU yamazwe angama-27.
UNgqongqoshe Wezokuvikela u-Oleksii Reznikov waxoshwa ngoMandulo nyakenye ngamacala enkohlakalo ahlukene naphezu kokujabulela idumela eliqinile lokumela i-Ukraine ezingxoxweni zayo nabalingani baseNtshonalanga.
Nakuba kwakungasolwa ukuthi wenza inkohlakalo yena mathupha, amacala amaningi athinta amasosha ngaphansi kobuholi bakhe, elinye elokunikeza amasosha ukudla, elinye elokuthengela amasosha izingubo ezifanele.
