Ibambe umoya iBafana Bafana ngezilomo zabadlali uKhuliso Mudau noMothobi Mvala
Ibambe umoya iBafana Bafana ngezilomo zabadlali uKhuliso Mudau noMothobi Mvala.
Bobabili la badlali bathintekile emdlalweni wokugcina wamaqoqo e-Africa Cup of Nations (Afcon).
IBafana ibambane ngo 0-0 neTunisia ngemuva kwalokho yazibekisela indawo esigabeni somkhumulajezi we-Afcon.
Ku-last 16, iNingizimu Afrika izodudulana neMorocco eStade de San Pedro kwelase-Ivory Coast ngoLwesibili ngehora le-10 ebusuku.
Umqeqeshi weBafana uHugo Broos utshele abezindaba ngoLwesihlanu ukuthi uMudau noMvala bangaphansi kweso likadokotela.
“UMothobi uthole umhuzuko kanti uMudau usazama ukululama. Ngithuke kabi ngimbona ehamba (uMudau) ngemuva kosuku lomdlalo (wethu neTunisia),” kuchaza uBroos.
UMudau ukhishwe ngemuva kwekhefu emdlalweni obuphakathi kweBafana neTunisia. Endaweni yakhe kugcine kungena uNyiko Mobbie.
“Bobabili abadlali bangaphansi kweso likadokotela. Odokotela basebenza ngokuzikhandla ukwenza isiqiniseko sokuthi kushaya usuku nesikhathi somdlalo wangoLwesibili sebesimeni esikahle,” kubeka uBroos.
UMvala useyidlale yonke imidlalo yeBafana kusukela kuqale i-Afcon. Ubekhona elakuleli lidliwa yiMali kowokuqala. Akazange asale ngesikhathi iBafana ibhabhadisa iNamibia ngo 4-0 kowesibili.
Uthinteke kowesithathu, iBafana ibambana neTunisia ngo 0-0. Uma egcin engalulami uBroos kuzomphoqa ukuthi abuyise uSiyanda “Magazi” Xulu noma adlalise uNkosinathi Sibisi.
UXulu usemanyamanambama kubalandeli bebhola eNingizimu Afrika kulandela ukushaya udaka emdlalweni wokuqala iBafana idliwa yiMali.
IBafana neMorocco bebeseqoqweni elilodwa kweyokuhlunga ukuzibekisela indawo ku-Afcon. IBafana igcine iqeda esicongweni. Idle iMorocco ngo 2-1 emdlalweni wokugcina obuseFNB Stadium ngonyaka odlule. Ekuhambeni yaguqa ngo 2-1 eMorocco.
Womabili la mazwe azama ukuqeda ishobolo leminyaka kulo mqhudelwano. IBafana sekuphele iminyaka engamashumi amabili nesishiyagalombili ihlulwa wukuphakamisa isicoco se-Afcon. Ngakolunye uhlangothi i-Atlas Lions yona sekuphele iminyaka engama-48 ingayinqobi i-Afcon.