Ulengelwa yizembe umqeqeshi weMan United ezongquzulana neLiverpool koweligi

Kuzohlukana inhloko nesixhanti ngeSonto ebusuku uma sekugamanxa ihora lesithupha enkundleni kanokusho i-Anfield Stadium lapho kuzodudulana khona izikhondlakhondla zamaqembu amabili ebhola kwelamaNgisi, iLiverpool Football Club neManchester United emdlalweni we-English Premier League (EPL).

Impela kuzoqhuma nhlamvana kanti ezinye ziyofeketha. Phela kubhekene izinkunzi zamaqembu ebhola kwelamaNgisi. Lamaqembu ayinkukhu nempaka ngenxa yomlando nempumelelo yawo. Ashiyana ngesicoco esisodwa nje kuphela seligi.

Ama-Red Devils yiwona ahamba phambili ngezicoco eziningi zeligi. Anqobe isicoco seligi izikhathi ezingamashumi amabili.

Ngakolunye uhlangothi ama-Reds okuyisidlaliso seLiverpool  asenqobe iligi amahlandla ayishumi nesishiyagalolunye. Ake ahlala iminyaka engamashumi amathathu ezabalazela isicoco seshumi nesishiyagalolunye.

IJalimane, uJurgen Klopp ongumqeqeshi, ufike wawakhipha amaReds ezweni lezoni wayifaka eKhenani ngesizini yowezi-2019/2020. Ngemuva kwalokho ayikaze iphinde ikhonye kweyeligi. Imiswe kabi ezinye izimbangi zeRed Devils, okuyiManchester City.

Njengamanje iLiverpool iyibambe esicongweni ku-EPL ngamaphuzu angamashumi amathathu nesikhombisa emidlalweni eyishumi nesithupha. Ihlukaniswe amaphuzu ayishumi namaRed Devils ahlezi endaweni yesithupha ku-log.

Kule sizini, ezikaKlopp zibheke ukucifa iMan United. Idinga isicoco esisodwa ukuze balingane ngezicoco zeligi. EzikaKlopp zivutha zingabaselwe kulezi zinsuku. Aziyazi induku emidlalweni eyisikhombisa eyedlule kuyoyonke imiqhudelwano.

Izimbangi zayo ziyadunguzela. Zisanda kusutha induku imidlalo emibili ilandelana. Ziqale zanenebulwa yiBournemouth ngo 3-0 e-Old Trafford. Kuthe kusenjalo zaqunjwa phansi yiBayern Munich ku-Uefa Champions League.

Isibhaxu esiqhume kwi-Uefa  siqede nya ngephupho lama-Red Devils lokuhamba ibanga elide kulo mqhudelwano elagcina ukuwunqoba ngowezi-2007/08 kusekhona uCristiano Ronaldo ngaphambi kokuthi ajoyine iReal Madrid yaseSpain.

Umqeqeshi weManchester United, u-Erik Ten Hag ulengele ezembeni lokukhonjwa indlela uma eqhubeka nokuphikwa yimiphumela. Udinga ukuphendula amatafula ngokushesha kungenjalo uzobona afika ngayo. Izinkumbi zabalandeli baleli qembu lase-Old Trafford sebeqalile ukulibeka ngembaba elokuthi ibhantshi aligcwale umoya kulo mqeqeshi odabuka eHolland.

Bakusho kugcwale umlomo ukuthi usebami emphinjeni uTen Hag ofike kumaRed Devils ethwelwe ngeqoma. Ufike kwezwakala eqeda isomiso sezindebe ngeLeague Cup. 

Ngesizini edlule iqembu langena kwelikhulu ihlazo lilotsholwa yiLiverpool ngo 7-0 koweligi.

Lesi sibhicongo sehlela iMan U khona e-Anfield okuzodlalwa kuyona umdlalo wangeSonto. Kuzovuka iminjunju kubalandeli beqembu. Namanje lesisilonda sisankenketha. ILiverpool izobe ibheke ukusivuvuzela usawoti. 

Ikuqonda kahle ukuthi ayikwazi ukulahla amaphuzu ngoba i-Arsenal uphefumula entanyeni yayo. Ingemuva kweLiverpool ngephuzu elilodwa ngemuva kwemidlalo efanayo.

IRed Devils izalelwe yinja endlini. Sekuphele iminyaka eyisishiyagalombili iRed Devils ihluleka wukuqoqa amaphuzu amathathu e-Anfield. Kule minyaka eyisishiyagalombili la maqembu ahlangane iziwombe eziyisikhombisa. ILiverpool inqobe imidlalo emine (7-0, 4-0, 2-0 nango 3-1) badlala ngokulingana kwemithathu.

Konke kuvuna iLiverpool ngomdlalo wangempelasonto yize kungaziwa ukuthi iyozala nkomoni.

Nanka amarekhodi alo mdlalo walezi zinkunzi:

Asehlangane kangaki la maqembu:

211.

Umdlali onemidlalo eminingi:

Ryan Giggs (48).

Umdlali onamagoli amaningi:

Mohammed Salah (12)

Yiliphi eselinqobe kakhulu:

Imiphumela emihlanu eyedlule yalamaqembu e-Anfield: