ISenegal igaqele ukungena emabhukwini omlando
Ama-Lions aseTheranga okuyigama ateketiswa ngalo yiwona avikela isicoco se-Africa Cup of Nations (Afcon).
Asinqobe ngowezi-2021 ethela othulini elaseGibhithe sekukhahlelwa amaphenathi kwelaseCameroon.
ISenegal bekungokokuqala idla ubhedu ku-Afcon. Kulo nyaka ibhekene nenselelo yokuvikela isicoco salo.
IZambia, Nigeria, Ivory Coast, Cameroon ne-Algeria bonke bahluleke bancama wukuvikela izicoco zabo kule minyaka eyedlule.
IChipolopolo yadla umhlanganiso ngowezi-2012 kwelaseGabon nase-Eqautorial Guinea kwathi iNigeria yakhonya ngowezi-2013 eNingizimu Afrika njengoba ngowezi-2015 kuphumelele elase-Ivory Coast e-Equatorial Guinea.
ICameroon ikhale yemuka nesicoco ngaphansi kobuholi bukaHugo Broos osecija iBafana Bafana ngowezi-2017 eGabon kwathi ngowezi-2019 kwanqoba i-Algeria eGibhithe.
Okucacayo wukuthi kule minyaka eyishumi nane alikho izwe elisaphumelele ukuvikela isicoco salo.
ElaseGibhithe yilona izwe elagcina ukwenza lomlando ngowezi-2010 kwelase-Angola. OFaro badla ubhedu ngowezi-2006 ngesikhathi bengosokhaya. Kuthe kusabatshazwa lokho baya eGhana ngowezi-2008 bafika bavikela isicoco sabo ngempumelelo. Bakuphindile lokho e-Angola ngowezi-2010.
ISenegal ibheke ukuba yizwe lokuqala ngemuva kweminyaka eyishumi nane ukuvikela isicoco salo.
Iqale kahle ku-Afcon eqhubeka kwelase-Ivory Coast. Kowokuqala ilobole iGambia ngo 3-0 kwathi kowesibili yaxebula iCameroon ngo 3-1.
Iqhwakele ngamaphuzu ayisithupha emidlalweni emibili. Ivele isizibekisele indawo esigabeni somkhumulajezi. Isibhakuzise inethi amahlandla ayisithupha yangenelwa yigoli elilodwa emidlalweni emibili.
Ivutha ingabaselwe. Namuhla ngehora lesi-7 ebusuku izodudulana neGuinea emdlalweni wokugcina wamaqoqo eStade Charles Konan Banny de Yamoussoukro.
Amabhubesi aseTheranga azobe ebheke ukunqoba umdlalo wayo wesithathu okuyinto engakaze yenziwe kule-Afcon eqhubeka kwelase-Ivory Coast.
ISenegal igaqele ukuzifaka ohlwini lwamazwe aseke avikela isicoco sawo ngempumelelo.
Ngowezi-2002, iCameroon yakwazi ukuvikela isicoco sayo kwelaseMali ngemuva kokukhonya kwelaseNigeria naseGhana ngowezi-2000.
IGhana yizwe lesithathu ukuvikela i-Afcon. Yayinqoba kulandelana ngowe-1963 nangowe-1965.
ElaseGibhithe selikwenze amahlandla aze aba bamathathu. Laba yizwe lokuqala ukuphakamisa isicoco se-Afcon ngesikhathi kuqala lomqhudelwano ngowe-1957. Yasivikela ngowe-1959.
ISenegal nayo ibheke ukuzifaka kulolu hla lwamazwe ayisiphesheli.