Umholi weNjampela unamathemba kuligi elandelayo
Injini ephinde ibe ngukaputeni weNjampela FC uMpilo Buthelezi uthi ukulungele ukulwela iqembu ukuthi linyukele kuMotsepe Foundation Championship ngesizini ezayo.
UButhelezi usho lokho ngesikhathi ekhuluma nelaboHlanga emveni komdlalo weNjampela FC noMsinga United ngeSonto, la maqembu abetholene ngeSonto kwaNgcedomhlophe Stadium, eMandeni.
Lo mdlalo ubungowamanqamu, njengoba kwagcina kunqoba iNjampela FC yaKwaNongoma okusho ukuthi iyona ezomela isifundazwe iKwaZulu-Natal emidlalweni yokuhlungela ukunyukela kwiMotsepe Foundation Championship.
Igoli elangena sekuyi-Extra Time lanqofelwa phakathi ngekhanada nguyena uButhelezi.
“Sijabule khona ukuthi sibe ngompetha beSafa KZN ABC Motsepe League esifundazweni iKwaZulu-Natal, kodwa muningi umusebenzi osasihlalele okuwukuthi sidlale kahle emidlalweni yokuhlunga. Ngizimisele ukuqhubeka nokuhola iqembu ngobuqotho, ngizolwa njengoba bengenza kuyona yonke imidlalo” kusho uButhelezi.
Imidlalo yokuhlunga kazwelonke izodlalelwa e-Upington, eNorthern Cape kusukela zithathu kuya mhla ziyishagalolunye kuNhlangulana.
“Ukunqoba kwethu iligi esifundazweni akubanga umlingo kodwa kube ukusebenza kanzima kusukela sizilungilela ukuqala kwesizini. Sesibheke ukuthi siyomela kahle isifundazwe,” kubeka uButhelezi.
Lo mdlali oneminyaka yobudala engama-29 isizini yakhe yesithathu kuNjampela FC, kanti lona leli qembu lineminyaka emine lasungulwa.
“Okumnandi akukhona okokuqala ngiyodlala imidlalo kazwelonke, ngaya neJDR Stars kumasizini edlule. Engakufunda lapho ngikholwa ukuthi kuzongisebenzela kakhulu, kanye neqembu. Umqeqeshi esinaye naye amava akhe azosisebenzela njengoba esefike isikhathi eside kuyona lemidlalo” usho kanje.
INjampela FC iqeqeshwa uTsepo Mostoeneng osezakhele igama ngokuyisa amaqembu emidlalweni yokuhlungela ukunyukela kuMotsepe Foundation Championship. Nonyaka okwesi-6 kulandelana.
Uma kungathiwa iNjampela FC iyanyukela kwiMotsepe Foundation Championship kobe kufezeke iphupho likasihlalo walo uVusi Buthelezi.
Lo sihlalo kusukela asungula leli qembu kwabe kwiliphupho lakhe ukuthi kwaNongoma kube neqembu elidlala esigabeni esikhokhelayo okanye ngaphansi kwe-Premier Soccer League (PSL).
