I-Joburg Super Kings ibhekene nomqansa kuBetway SA20


Kumnyama ebusweni benkawu kuJoburg Super Kings esiphenduke ukudla kwenduku kuBetway SA20.
Izolo ebusuku leli qembu lithelwe othulini yiPaarl Rocks ngamawikhethi ayisikhombisa emdlalweni obuseNewlands Cricket Ground, eKapa.
Bese kungokwesithathu emidlalweni emine leli qembu laseGoli likhala ngaphansi kulo mqhudelwano.
Omunye umdlalo walo waphazanyiswa yimvula kade kumele libhekane nompetha iSunrises Eastern Cape eSt George’s Oval, eGqeberha kowokuvula.
Ngemuva kwalokho iguqiswe yiMI Cape Town ngama-run angama-98. Kuthe kusabatshazwa lokho yaqunjwa phansi yiDurban Super Giants ngama-run angama-37 njengoba izolo exetshulwe yiPaarl Rocks.
Leli qembu elibophele izibabuli ezifana noFaf Du Plessis, Reeza Hendricks, Moeen Ali noNandre Burger liyibambe endaweni yesibili uma usuka ekugcineni ku-log yeSA20.
Lisathola amaphuzu amabili kuphela alawathola ngesikhathi umdlalo wayo neSunrises uphazanyiswa yimvula.
ISuper Kings kuzomele iguqule amatafula ngokukhulu ukushesha uma ifuna ukuzibekisela indawo kowandulela amanqamu alo mqhudelwano.
NgoMgqibelo ngo-6 ebusuku leli qembu lizoshukana nePretoria Capital eDP World Wanderers emdlalweni okumele bawunqobe kumnyama kubomvu.
Ilanga liyashona kuSuper Kings kumele iqale iqoqe amaphuzu uma izimisele ngokuhamba ibanga elide.