ElaseThekwini libhaxabula kwasani kweyeSA20

Ilokhu iqhubeke njalo nokuvulela isibhaxu iDurban Super Giants kuBetway SA20.

Ngemuva kwemidlalo emithathu kulo mqhudelwano leli qembu laseThekwini aliyazi induku. Selinqobe imidlalo emithathu ilandelana.

Njengamanje yilona elihlezi esicongweni. NgoMsombuluko lititinye iJoburg Super Kings ngama-run angama-37 eHollywoodbets Kingsmead Cricket Ground.

UKeshav Maharaj ohola iDSG unqobe ithosi wathatha isinqumo sokubhetha kuqala kulo mdlalo.

Ezakhe zibhalise ama-run ayi-145 kusawe amawikhethi ayisishiyagalombili kuma-over angamama-20.

UHeinrich Klaasen uqhubekile nefomi yakhe enhle ngesikhathi eshaya ama-run angama-64 emabholeni angama-41.

IDurban Super Giants ishwibe ngokucophelela. Ikwazile ukuvikela isibalo sayo sama-runs ali-145.

Iyivalele ekopini iSuper Kings yagcina yenze ama-runs ali-109 kuma-over angama-20. Ilahlekelwe ngamawikhethi ayisishiyagalolunye.

Ngaleyo ndlela iSuper Giants yaphumelela ngama-run angama-37. Bekungumdlalo sesithathu ulandelana leli qembu laseThekwini liqoqa amaphuzu agcwele.

Ngemuva kwemidlalo emithathu isiqoqe amaphuzu ali-13. Ivule igebe lamaphuzu amahlanu esicongweni kuPaarl Rocks eyibambe kweyesibili.

Kowokuqala iSuper Giants iguqise iMI Cape Town ngama-runs ali-11 ngohlelo lweDuck-Worth-Lewis Method ngemuva kokuthi umdlalo uphanyiswe imvula eKingsmead.

Kowesibili ithele othulini iSunrises Eastern Cape ngama-run angama-35 emdlalweni obuseSt George’s Oval, eGqeberha ngempelasonto.

NgoLwesine izobhekana nePretoria Capital eSuperSport Park ngehora lesi-5.30 ntambama. Kubhekwe ukuthi iqhubeke ngomgqigqo ofanayo.

UKlaasen usefomini embi. Useqokwe kabili emidlalweni emithathu njengomdlali ovelele ngenxa yemilingo yakhe ngebhethi.

NangoLwesine amehlo azobe ethe njo kuyena ngokuthi aqhubeke nokwenza kahle.