Isizwe iphenathi ngomzuzu wokugcina iBurkina Faso ukuze inqobe

Uphenduke iqhawe ukaputeni waseBurkina Faso uBertrand Traore engena esuka ebhentshini wafika watholela izwe lakhe igoli lokunqoba emdlalweni wokuqala we-Africa Cup of Nations (Afcon).

Ama-Stallions athele othulini iMauritania ngo 1-0 wegoli likaTraore okubeyiphenathi ngomzuzu wama-90 emdlalweni obuseStade Bouake.

UTraore ukhiphe ingcwenga yephasi ehlangane noGuira. Ufike kuqala ebholeni ngemuva kwalokho waliqhuba kanye okuphoqe isitobha saseMuaritania u-Aly Abeid ukuthi azame ukumvimba.

Ngebhadi uhlulekile wukuthola ibhola wahlaba u-Adama Guira. Unompempe akazange ayibone iphenathi kwazise ukhombe ikhona. Kulamule iVAR eholele ekutheni unompempe ashintshe isinqumo sakhe.

UTraore uthathe ibhola walijikijila enethini ngomzuzu ka-96. Leli nxele lingene kwezwakala. Ngowama-81 ucishe wabeka ezakhe phambili.

IBurkina Faso iyona ebiphethe umdlalo kodwa iMauritania yakhe amathuba angcono ihlasela sakuzumisa.

UHerve Koffi ovimbela iBurkina Faso ubambe amabhola anzima ukugcina ezakhe zisemdlalweni.

Ama-Stallions abeqala ukunqoba umdlalo wokuqala ku-Afcon. Ngakolunye uhlangothi iMauritania isathungatha amaphuzu ayo amathathu okokuqala emlandweni walo mqhudelwano.

Ngemuva komdlalo owodwa iBurkina Falso iyona esihlezi esicongweni ngamaphuzu amathathu.

NgoMgqibelo isizobhekana ne-Algeria ngo-4 ntambama eStade Bouaké. I-Algeria iqale kabi kulo mqhudelwano ibanjwa yi-Angola ngo 1-1 izolo ebusuku.

Kowokugcina izobhekana ne-Angola ngoLwesibili ngo-10 ebusuku. Ama-Stallions azohlalela ethembeni kokuthi azokwazi ukuthola amaphuzu amathathu okwesibili ngoMgqibelo ukuze azibekisele indawo kuma-last 16.

Azophinde abeke amathemba awo kuTraore ekutheni aqhamuke neminye imilingo.