UMane nezakhe bengazifaka yini emabhukwini omlando?

ISenegal igaqele umlando ongandele bani ku-Africa Cup of Nations (AFCON) ezobanjelwa kwelase-Ivory Coast.

I-The Lions Of Tharaga (Senegal) iyona evikela isicoco se-Afcon esinqobe ngesikhathi iguqisa elaseGilibhithe sekukhahlelwa amaphenathi ngowezi-2022 kwelaseCameroon.

Kulo nyaka iSenegal ibheke ukuba yiqembu lesine emlandweni we-Afcon ukuvikela isicoco se-Afcon ngempumelelo.

Iqembu lesizwe laseGibhithe laba yiqembu lokuqala emlandweni walo mqhudelwano omkhulukazi webhola e-Afrika ukuphakamisa inkomishi ye-Afcon amahlandla amabili elandelana. 

Ngowezi-1957, oFaro badla ubhedu kwathi ngowezi-1959 yaphinde yakhonya okwesibili imiqhudelwano ilandelana.

ElaseGibhithe selikwenze lokhu amahlandla aze abamabili. Ngowezi-2006 abe ngompetha engosokhaya. Akuphindile lokho kwelaseGhana ngowezi-2008 nangowezi-2010 e-Angola.

Kusukela lapho alikho elinye izwe elike lavikela i-Afcon kule miqhudelwano eyisikhombisa eyedlule.

ISenegal izobe  ibheke ukuqeda  lomkhokha ngokubayizwe lesine ukungena kulo mlando okuyingqayzivele.

Amanye amazwe amabili ayingxenye yalo mlando  ngaphandle kwelaseGibhithe kukhona iGhana neCameroon.

IBlack Stars yaba izwe lesibili ukuvikela isicoco se-Afcon ngempumelelo. Yadla ubhedu ngowe-1963 yase ibuya ivikela okungokwayo ngowe-1965.

ICameroon iyibambe endaweni yesithathu. Ngowezi-2000 yayivutha ingabaselwe kwelaseGhana naseNigeria. Iyona eyagcina idle ubhedu.

Iphinde yaqhubeka lapho ngo-2002 kwelaseMali. Kulokhu wonke amehlo  athe njo kuSenegal eboshelwe eqoqweni elilodwa neGambia, Cameroon neGiunea 

USadio Mane kubhekwe ukuthi aphinde abambe elinye iqhaza elikhulu ekutheni ezakhe zihambe ibanga elide kulo mqhudelwano.

ISenegal izovula neGambia ngoMsombuluko ngele-4 ntambama bese kuthi ngoLwesihlanu ibhekana neCameroon. Izovala eyamaqoqo neGiunea. Amazwe amabili aqede phezulu azodlulela esigabeni somkhumulajezi.