Ugxeke abadidiyeli bezinkundla ngemuva kwenzukakeyi eyenzeke eKapa
Ingwazi yamaProteas, uShaun Pollock, ihlabe abadidiyeli bezinkundla eNingizimu Afrika ngemuva kwesimanga esenzeke eNewlands Cricket Ground, eKapa.
Elakuleli belibhekene neqembu lesizwe laseNdiya emidlalweni emibili yochungechunge lwama-Test.
Lolu chungechunge luphele lamazwe ebambene ngo 1-1. INingizimu Afrika inqobe umdlalo wokuqala nge-Innings nama-run angama-32 eSuperSport Park, eCenturion, ePitoli kwathi owesibili waphumelelwa ngelaseNdiya ngamawikhethi ayisikhombisa.
Umdlalo wokuqala uphele ngosuku lwesithathu. Owesibili ushiye abaningi bebambe ongezansi uphela ngosuku lwesibili ngemuva kwekhefu lesidlo sasemini.
Ngosuku lokuqala kuwe amawikhethi angama-23 okuyisibalo esiningi samawikhethi esake sawa eNingizimu Afrika kusukela elakuleli labuyiselwa emidlalweni yamazwe ngowe-1992.
“Uma udlala ezinkundleni ezomile okungeyona into oyifunayo, uma ujikijikela ibhola kumele lihambe ngesivinini elijikijelwe ngaso. Asikwazi ukubukela abadlali beshwiba ngesivinini se-130 wamakhilomitha ngehora kube sengathi kujikijela izingwazi zakudala zaseWest Indies, uWalsh no-Ambrose ababelinemba ngenkani igilavu. Yebo, ngosuku lwesine nolwesine inkundla ingakwenza lokho hhayi ngosuku lokuqala nolwesibili. Uma sikhuluma iqiniso asizange sikubone lokhu lapha eKapa naseGoli. Empeleni sekunesikhathi singakuboni,” kubalisa uPollock.
AmaProteas akhishwe wonke asenze ama-run angama-55 kuma-over angama-24 ku-Innings yokuqala kwathi elaseNdiya lahlanganisa angama-153 kweyawo yokuqala. Ake alahlekelwa ngamawikhethi ayisithupha engazange athole ngisho i-run eyodwa.
ElaseNdiya ligcine lijaha isibalo sama-run angama-79 ukuze linqobe. Nakhona lizabalaze kanzima. Umzansi uthathe amawikhethi amathathu.
“Nangesikhathi kudlala iSA T20 iningi lezingqapheli bezikhala ngohlobo lwezinkundla oludidiyelwa ngabahlezi bazo. Umuntu ushwiba isivinini sika-110 wamakhilomitha ngehora bekubukeka sengathi uhamba ngesivinini sika-120 wamakhilomitha ngehora. Ngikhathazekile okwangempela ngendlela abadidiyeli bezinkundla abathaka ngayo izinkundla kulezi zinsuku. Indlela abadidiyela ngayo ingishiya nemibuzo yokuthi ngabe bayakwazi ngempela ukudidiyela izinkundla ngokwezinga elifanele. Akukhona kuleli kuphela kodwa nakwamanye amazwe. Ngonyaka odlule ngithuke kabi amaProteas edlala ne-Australia eBrisbane. Ngemuva komdlalo kwavuma wonke umuntu ukuthi inkundla ibibheda. Isimo saze sashintsha sesidlala eMelbourne Cricket Ground nase-Sydney Cricket Ground,” kusho uPollock.
Umdlalo wesibili phakathi kweNdiya namaProteas kube ngumdlalo osheshe ukuphela kunayo yonke emlandweni wekhilikithi. Uphele ngosuku lwesibili ngesiwombe sesibili esikhathini esingangehora.
“Sithwele kanzima ikakhulukazi njengoba singenabo ababhethi. Mhlawumbe eqenjini lethu sinabadlali abathathu ongabathemba ngebhethi. Iningi labo lishaya ngesibalo sokubhetha esingaphansi kwama-30. UBedingham nguyena obeshaya ngesibalo sokubhetha esingaphezu kwama-50 ngaphambi kwalo mdlalo kodwa naye usehlile ngemuva kwalo mdlalo. Kumqoka ukuthi sididiyele izinkundla eziseqophelweni eliphezulu ukuze sizofukula izinga lababhethi eNingizimu Afrika. UDean Elgar nguyena obenesipiliyoni kodwa naye usethatha umhlalaphansi.”
Ngaphandle kuka-Aiden Markram akekho omunye umdlalo onesipiliyoni. Asididiyele izinkundla ezizokwenza imidlalo yama-Test ihambe ibanga lezinsuku ezine nezinhlanu. Sinabo abashwibi abangasithathela amawikhethi angu-20. Asiludingi lolu hlobo lwezinkundla ezididiyelwa njengamanje,” kuqhuba uPollock.
UMarkram nguyena kuphela okwazi ukushaya ikhulu emdlalweni wesibili.
“Phambilini besingashiyi utshani ebaleni okudlelwa kulona. Bakwenza ngamabomu lokho ngoba befuna ibhola litshuze emoyeni uma liqeda kungqoma phansi. Emdlalweni wokuqala u-Ashwin akazange ashwibi. Nakulo mdlali akekho umdlali ophosa uhlobo lwe-spin ozoshwiba. Lokho okuyona into enhle.” kusonga uPollock.