ISuperSport ilaxaza imiqhudelwano yeCaf
Isikhulu esisha senkampani yesiteshi sikamabonakude, iSuperSport asiyifuni nokuyizwa eyemiqhudelwano emikhulu yeConfederation of Africa (Caf).
ElaboHlanga lithole ngemithombo yalo engaphakathi ukuthi lesi sikhulu (esinalo igama laso kodwa esiligodlile) sifike nenqwaba yezinguquko kulesi siteshi.
Muva nje iSuperSport ikhiphe isitatimende imemezela ukuthi ngeke iyisazakaze i-Africa Cup of Nations (Afcon) eqalayo ngeviki elizayo e-Ivory Coast.
“Lesi sikhulu asiyizwa indaba yemiqhudelwano yeCaf. Sikholwa wukuthi asinayo inzuzo. Yingakho nje le nkampani ingazange iwathenge amalungelo okusakaza i-Afcon. ICaf Champions League nayo ayisekho kuSuperSport kusukela kufike lesi sikhulu. Lapha ngikhuluma ngeyabesifazane nabesilisa. Imidlalo yokuhlungela iNdebe yoMhlaba emazweni ase-Afrika nayo ayisasakazwa kulesi siteshi. Ne-African Football League ayizange itholakale kuSuperSport,” kubeka umthombo welaboHlanga ongaphakathi kwaSuperSport.
NgoLwesithathu ntambama abakwaSuperSport bakhiphe isitatimende beqinisekisa ukuthi ngeke bayisakaze imidlalo ye-Afcon.
“ISuperSport njengesiteshi ngeke iyisakaze imidlalo ye-Afcon ehlelelwe ukuthi iqale mhla ziyishumi nantathu kuMasingana ize isongwe mhla ziyishumi nanye kuNhlolanja ngoba yehlulekile wukuthola amalungelo okusakaza lomqhudelwano. Noma kunjalo kodwa lo mqhudelwano uzotholakala esiteshisini esingakhokhisi (SABC). UMultichoice e-Afrika uzimisele ngokuqhubeka nokuletha ubumnandi bebhola lase-Afrika okubalwa kuwona neligi yaseZambia,” kuchaza isitatimende.
Selokhu kufike lesi sikhulu esisha iSuperSport isakaza kakhulu i-Uefa Champions League, Europa League, imidlalo yokuzibekisela indawo ku-Euro nemidlalo yokuhlungela ukuzibekisela indawo kweyeNdebe yoMhlaba yamaqembu esizwe aphesheya kwezilwandle.
“Phakathi kwezinye izinguquko lesi sikhulu esifike nazo wukuthi abasakazi abasakaza ngolwimi lwesiNguni basakazele ekomkhulu walenkampani eRandburg ukuze kwehliswe izindleko zokuhamba emidlalweni yeDSTV Premiership. Njengamanje sekuhamba abasakazi ngolwimi lwesilungu noma emidlalweni eseGoli naseThekwini kuphela. Nakhona yingoba vele uPhumlani Miya uhlala eKZN. Ukube ungowaseGoli ngabe usakazela eRandburg,” kubeka umthombo.