ITurkiye iseka elakuleli ecaleni elifakele u-Israeli
Uhulumeni wase-Türkiye umemezele ukuthi uyaseseka isicelo seNingizimu Afrika eNkantolo Yobulungisa Yamazwe Ngamazwe (International Court of Justice) ngokumelene ne-Israel mayelana nokwephulwa kwezibopho ngaphansi kwe-Convention on the Prevention and Punishment of the Crime of Genocide yangowe-1948.
Lohulumeni uthi ukubulala kuka-Israyeli kwezakhamizi zasePalestine ezingaphezu kwezi-22,000, iningi lazo okungabesifazane nezingane eGaza cishe izinyanga ezintathu, akufanele kudedelwe ngaphandle kwesijezo.
Uhulumeni waseTürkiye uthe labo ababhekene nalezi zigameko zokubulala kumele baphendule phambi komthetho wamazwe ngamazwe. Lo hulumeni uphinde waveza ukuthi unethemba ukuthi lolu hlelo luzophothulwa ngokushesha.
Lohulumeni uphinde wa thi ngaphansi kwalesi sicelo, iNkantolo Yobulungisa Yamazwe Ngamazwe kulindeleke ukuthi ikhiphe isivimbelo sesikhashana esiyalela u-Israeli ukuthi umise ukuhlasela kwayo eGaza. ITurkey iphinde yasho ukuthi izolandela ukuqaliswa kwalesi sinqumo.
Icala elifakwe yiNingizimu Afrika elibhekene no-Israel eNkantolo Yobulungisa Yamazwe Ngamazwe e-Hague yicala lokuqala eliyingqophamlando elizofakwa selokhu kwaqala ukuziphindiselela kwamasosha akwa-Israel ekuhlaselweni kweHamas ngoMfumfu ziyisi-7, kodwa lolu hlelo luzobhekana nokuphikiswa okuqinile okuvela kubalingani bakwa-Israel.
Uhulumeni waseNingizimu Afrika usole amasosha akwa-Israel ngokwenza izenzo “zokubulala abantu ngobuhlanga” eGaza. Icala elifakwe yiNingizimu Afrika lizodala impi yezomthetho enzima okungenzeka iqhubeke iminyaka embalwa. Izophinde idwebe imigqa ecacile ehlukanisayo phakathi kwamazwe agxeka u-Israeli ngempendulu yawo yezempi ekuhlaselweni kweHamas ngoMfumfu ziyisi-7 kanye nalabo abakubona njengesenzo sokuzivikela esisemthethweni.
INingizimu Afrika ithe izenzo zika-Israeli eGaza zifana nokuqothulwa kohlanga futhi icela isinqumo seNkantolo Yobulungisa Yamazwe Ngamazwe siveze ukuthi u-Israeli uphule futhi uyaqhubeka nokuphula isibopho sawo mayelana nokuqothwa kohlanga. Manje u-Israeli usibize icala elifakwe yiNingizimu Afrika njengokuxhashazwa kwenkantolo okunengekayo nokunezingxabano okufana necala legazi.
INkantolo Yobulungisa Yamazwe Ngamazwe ngesonto elizayo, kusukela mhla zili-11 kuya kumhla zili-12 kuMasingana izolalela udaba olulethwe yiNingizimu Afrika ngokumelene no-Israeli. U-Israeli uzichithile lezi zinsolo ethi iNingizimu Afrika ivikela iHamas eyenze isihluku ngomhla-7 kuMfumfu nyakenye kwizakhamizi zakwa-Israel.
UMqondisi-Jikelele woMnyango Wezobudlelwano Bamazwe Nokubambisana, uZane Dangor, uthe iNingizimu Afrika isikulungele ukwethula udaba lwayo. “Indlela esisabela ngayo ukuthi sifake isikhalo ku-ICJ mayelana nesenzo sokuqothulwa kohlanga oluthize…ukuvimbela noma ukujezisa ubugebengu bokuqothulwa kohlanga,” kusho uDangor.
