Uyaqhubeka nokudlondlobala uLetsholonyane ekuqeqesheni
Lowo owazakhela udumo kwiKaizer Chiefs nakwiBafana Bafana uReneilwe “Yeye” Letsholonyane, ulokhu eqhubekile nokudlondlobala ekubeni ngumqeqeshi.
Muva nje uLetsholonyane kuvele ukuthi uthole uCaf A Licence nayithole eBotswana, okuyibheji elibalwa njengelesibili kwamakhulu lilandela uCaf Pro Licence.
Kwenzeka lokhu iminyaka ilandelana njengoba ngowezi-2021 wahlomula ngo-C Licence lapha eNingizimu Afrika, u-B License wona wawenza ngowezi-2022 eZambia.
Ukudlondlobala kukaLetsholonyane ekuqeqesheni kusatshengisa khona ukuthi uyisibonelo esihle kuleli, njengoba ngisho ngezikhathi zakhe zokudlala wayehlezi eziphethe kahle ngaphandle nangaphakathi kwenkundla.
Ngowezi-2021 ngesikhathi ememezela ukuthatha umhlalaphansi waqeqesha iqembu aseke agijima kulo iPimville Young Stars, nagcine ethenga amasheya kuyona.
Leli qembu lingelidala njengoba lakhiqiza yena uLetsholonyane, uDavid Zulu, uJoseph Ngake noCryil Nzama.
Nyakenye ngoMasingana wamenyezelwa njengomqeqeshi wa-AmaZulu FC eqenjini labaneminyaka engaphansi kweli-17, nalapho afike enza ezibukwayo enqoba i-Engen Knockout esifundazweni iKwaZulu-Natal.
NgoNcwaba ube esenyuselwa ekutheni aqeqeshe iqembu eligijima kwi-DStv Diski Challenge (DDC), kuwona AmaZulu FC.
Ukuthola kwakhe leLicence uLetsholonyane kumvulela ithuba lokuthi usengaqeqesha kwi-DStv Premiership noma kuMotsepe Foundation Championship. Kanti futhi uma kungathi iSafa iyamdinga kwelesizwe engaya khona.
ISafa imemezele ukuthi ngesizini ka-2024/25 umqeqeshi oqeqesha kwi-DStv Premiership nakwiMotsepe Foundation Championship kumele abe noCaf A kuthi isekela lakhe libe no-B Licence. Ku-ABC Motsepe League kanye nakwi-Hollywoodbts Super League kumele abe no-C Licence.
