Ayaqhubeka nokutheza kuleli amaqembu aseMexico

Siyanda isibalo sabadlali beqembu lesizwe iBanyana Banyana abafudululeka kuligi enkulu yaseMexico iLiga BBVA Femenil. 

Indlela yokuya eMexico esezwenikazi iSouth America, ivulwe izintokazi ezimbili uJermaine Seoposenwe noThembi Kgatlana. 

UJermaine ongumgadli ufike eMexico wajoyina iMonterrey esembangweni weligi, njengoba emva kwemidlalo eli-17 inamaphuzu angama-38 endaweni yesine. 

UThembi yena usayine ngezizumbulu kwiTigers UANL okuyiyo ezihola phambili kulogi ngamaphuzu angama-44 emdlalweni eli-17. 

Ekuqaleni kwesonto kube sekuvela amagama abadlali ababili bakuleli ukuthi nabo sebezoyibamba eMexico. 

Labo badlali uHilda “Bread Winner” Magaia noSinoxolo Cesane, bobabili bajoyine iqembu elilodwa iMezaltan Futbol Club. 

Lezi zintokazi ezimbili zibhekene nomukhulu umqansa wokuthi zisize iqembu lazo ukuthi lisuke emsileni. 

IMezaltan FC emvakwemidlalo eli-17 isakwazi ukuthola amaphuzu amabili kuphela nokwenza kube yiyo ebambe ibhuleki emsileni. 

UHilda ngaphambi kokuya eMexico ubedlala eqenjini laseSouth Korea iSejong, uNoxolo yena ubekwi-East Tennessee State University yase-USA. 

Kule mpelasonto zonke lezi zintokazi zizobe zibhekwe kakhulu ukuthi zidlale emaqenjini azo, njengoba ikhuza ibuya imidlalo emva kwekhefu likancibijane. 

Ukwenza kahle kwiNdebe YoMhlaba nyakenye kungenye imbangela eyenza amaqembu amaningi elokhu esayinisa abadlali bakuleli.

Umdlalo olandelayo weBanyana Banyana uzoba ngoMbasa lapho izotholana phezulu neTanzania kowokuhlungela ukuya kuma-Olympics azobanjelwa eParis nonyaka.