UMarkram ufuna abadlali abasefomini eqenjini elilungiselela iNdebe yoMhlaba
Ukaputeni wamaProteas u-Aiden Markram usekubeke kwacaca ukuthi iminyango ayikavalwa kubadlali abasanentshisikelo yokuzitholela ithikithiki elibheke eNdebeni yoMhlaba yeT20 ezobanjelwa kwelaseWest Indies naseMelika ngonyaka ozayo inqobo nje uma besefomini.
UMarkram nguyena ohola iqembu elidlala imidlalo yeT20. Ukusho lokhu ngemuva kokuthela othulini elaseNdiya ngamawikhethi amahlanu eSt Goerge’s Park, eGqeberha ngoLwesibili ebusuku ngaphansi komthetho weDuck-Worth-Lewis-Method.
AmaProteas abhekene neqembu lesizwe laseNdiya kuchungechunge lwemidlalo emithathu yeT20. Owokuqala uphazanyiswe yimvula eHollywoodbets Kingsmead Cricket Ground, eThekwini ngeSonto.
Elakuleli selihamba phambili ngo 1-0 kulolu chungechunge lwemidlalo emithathu yeT20. Owokugcina uzodlalelwa eDP World Wanderers Stadium, eGoli, kusasa ngehora lesi-5 ntambama.
“Njengamanje kunzima ukucabanga ngabadlali abangesiyona ingxenye yeqembu njengoba sikhuluma. Uma ubheke kweyeNdebe yoMhlaba ufuna ukuqoka abadlali abasefomini. Ufuna abadlali abanesipiliyoni, asebenze umsebenzi iminyaka nabaqondayo indlela iqembu elizimisele ukudlala ngayo. Ekugcineni singabantu amaphutha azohlala ekhona. Okuhle ngamaphutha-ke wukuthi ayalungiseka. Njengamanje iqembu liza kahle,” kusho uMarkram.
AmaProteas adlala ngaphandle kwezinsika ezifana noQuinton De Kock (odlala kuBig Bash kwelase-Australia), Lungi Ngidi no-Anrich Nortje (abalimele), noKagiso Rabada ophunyuziwe.
“Ngeneme ngendlela uReeza Hendricks adlala ngaye (ushaye ama-run angu-49 emabholeni angu-27). Isimibili manje iminyaka esenzela umsebenzi omuhle wokwakha isisekelo esiqinile ekuqaleni komdlalo. Ukuphindile lokho namuhla (ngoLwesibili). Ukwenze ngendlela yakhe eyehlukile,” kuqhuba uMarkram.
Imvula ike yasikaza ukuphazamisa umdlalo wesibili ngoLwesibili kodwa yabuye yehla.
“Abalandeli batheleke ngezinkani eThekwini. Kubeyishwa nje ukuthi sigcine singadlalanga ngenxa yemvula. Nalapha ePort Elizabeth abalandeli baphume ngobuningi babo. Ngijabule ukuthi babheme bakholwa,” kuchaza uMarkram.
