IGalaxy ingase iphinde iqophe omunye umlando eMoses Mabhida Stadium
I-TS Galaxy Football (FC) isethubeni elihle lokuphinde iziqophele omunye umlando Moses Mabhida Stadium.
NgoMgqibelo ngo-3 ntambama, iRockets izodudulana neStellenbosch emdlalweni wamanqamu weCarling Knockout Cup, eThekwini.
Iqembu elizodla ubhedu lizokhala lemuke nesicoco nesamba sezigidi eziyisithupha samarandi.
Ngowezi-2019, iGalaxy yazifaka emlandweni ngokuba yiqembu lokuqala eligijima kuNational First Division (NFD) noma ezigabeni esiphansi ukuphakamisa isicoco eNingizimu Afrika.
Leli qembu laKwaNdebele, eMpumalanga laqumba phansi iKaizer Chiefs ngo 1-0 wegoli likaZakhele Lepasa eMoses Mabhida eyayigcwele ithe phama.
Namanje iRocket kaTim Sukazi iyona esaphethe leli rekhodi. NgoMgqibelo inelinye ithuba lokuphinde izibhalele umlando.
Ingase ibeyiqembu lokuqala ukuphakamisa isicoco seCarling Knockout Cup. Lo mqhudelwano uvale isikhala seTelkom Knockout.
Umqeqeshi weGalaxy usagaqele isicoco sakhe sokuqala selokhu etheleke eNingizimu Afrika eminyakeni emibili eyedlule ukuzoshayela umkhumbi weqembu.
Ubhekene neStellenbosch esathungatha isicoco sayo sokuqala ezingeni eliphezulu. IStillies izobe idlala okokuqala kowamanqamu kanti iGalaxy kuzobe kungokwesibili.
USteve Barker ocija leli qembu laseKapa useke wahlala ebhentshini kowamanqamu. Ngowezi-2009 wabhuqiziswa yiMoroka Swallows kowamanqamu weNedbank Cup ngesikhathi epheka iPretoria University eyayibophele o-Andile Jali, Phenyo Mongalo noMthokozisi Yende.
NgoMgqibelo akwaziwa iyozala nkomoni eMabhida. Okusalayo kukhona ozolahla. Womabili amaqembu asidingela izizathu ezahlukene lomqhudelwano.
IGalaxy ikhiphe iMamelodi Sundowns emzuliswaneni wokuqala kwathi kowesibili yaqumba phansi iSekhukhune United ngaphambi kokudlula kuMaZulu kowandulela amanqamu.
Ngakolunye uhlangothi iStellies ikhiphe iChippa United, Polokwane City neRichards Bay FC ngokulandelana ngaphambi kokufinyelela kowamanqamu.