Abasalanga ngaphandle abakuleli kukonyeliswa abenze kahle e-Africa

Kuphelile izolo kusihlwa ukuqagela ukuthi obani abazonqoba imikomelo kumaCaf Awards wanyaka wezi-2023.

Lo mcimbi obudle ngobukhazikhazi base-Africa, ububanjelwe ePalais des Congress, Movenpick, Marrakech eMorocco.

Lapha bekukhona imikomelo emikhulu ebibhekiwe okubalwa umqeqeshi owenze kahle, abadlali abenze kahle, amaqembu enze kahle neminye iminxa ehlukahlukene.

Nabalapha eNingizimu Afrika kukhona abaye phambili bafike bamukela imikomelo akade beqokelwe kuyona.

Kwabakuleli abanqobile uDesiree Ellis oqeqesha iBanyana Banyana obe ngumqeqeshi wabesifazane obaqwaqwade bbgonke emakhanda. Kumunxa wakhe ubeqokwe noReynald Pedros waseMorocco kanye noJerry Tshabalala wakuleli.

UDesiree kuzokhumbuleka ufake iBanyana Banyana emlandweni wokuthi ifike okokuqala kwiLast kumqhudelwano weNdebe YoMhlaba, kuyimanje isizibekele indawo kowe-Women’s African Cup of Nations (Wafcon) elandelayo.

Abaningi lomkomelo bebebheke ukuthi unqotshwe uShabalala kwazise neMamelodi Sundowns Ladies unqobe iCaf Women’s Champions League, iCosafa Women’s Champions League neHollywood Champions League.

ISundowns Ladies inqobe iClub of the Year kwabesilisa, kade iqhathwe namaqembu aseMorocco, iSporting Casablanca ne-ASFAR Club.

Umgadli wakuleli odlalela i-Al Ahly uPercy Tau unqobe umkomelo we-Inter Club Player of the Year kwabesilisa eguqisa uPeter Shalulile waseNamibia noFiston Mayele waseCongo.

Kweminye imikomelo ebibhekiwe kubusuku bayizolo, u-Asisat Oshoala waseNigeria onqobe oweCaf Footballer of the Year kwabesifazane nanyakenye uye onqobe lomkomelo. Kwabesilisa kuwo lomunxu kube uVictor Osimhen waseNigeria.

Umqeqeshi wonyaka kwabesilisa kube uWalid Regragui waseMorocco, Club of the Year kwabesilisa i-Al Ahly, uGoalkeeper of the Year kwaba uYassine Bounou waseMorocco.

Iqembu lonyaka labesifazane emazweni kube iNigeria, nakhona okubukeke kunogcobho njengoba bekubhekeke kunqobe iBanyana Banyana.