Umawa aphinde avuke! Inunu engafi!

November 17, 2023


nguSabelo Maphumulo
UMaphumulo uyintatheli yezemidlalo.
Usephinde wavumbuka kwelinye iqembu eligijima kuDSTV Premiership umqeqeshi odabuka kwelamaJalimane, u-Ernst Middendorp.
Namuhla umenyezelwe njengomqeqeshi omusha weCape Town Spurs. Ngenyanga edlule iSpurs ixoshe obengumqeqeshi uShaun Bartlett kulandela ukuphikwa yimiphumela.
USean Connor ongusomaqhinga weqembu nguyena obambe izintambo emasontweni adlule.
UMiddendorp oseseqeqeshe inqwaba yamaqembu okubalwa iKaizer Chiefs, Maritzburg United, Swallows, neChippa United ubekelwe umbandela wukusindisa iqembu ezembeni.
Ugcine ukubonakala kuleli ngesizini edlule eyibambe kuSwallows. Ekuqaleni kwesizini uke wayibambe kuSingida yaseTanzania kodwa kwasheshe kwaqhuma idivosi.