Imbiza izobe iziwa ngothi ePrincess Magogo
Umphakathi waKwaMashu namaphethelo ongabalandelj bakanobhutshuzwayo, isizungu into abazoyizwa ngendaba kule mpelasonto. Okuzobaqedisa isizungu ukuthi ePrincess Magogo kuzobe kunendumezulu yemidlalo yeDStv Diski Challenge (DDC).
Kunalendumezulu yale midlalo nje, lena impelasonto yeFIFA lapho okudlalwa khona amazwe. Imidlalo ezobe isenkundleni iPrincess Magogo, izoba mine, yonke kulindeleke ukuthi kuguge utshani kuyona. Umdlalo okuyiwo ozovula indumezulu yemidlalo ophakathi kweMoroka Swallows neLamontville Golden Arrows. Lo mdlalo uzoqala libumbene ele-10 ekuseni.
La maqembu womabili eza kulomdlalo ayatshutshumbelwa njengoba ngeledlule ethole induku, iSwallows ihlulwe iChippa United ngamabili kwelilodwa. ILamontville Golden Arrows yona ihlulwe iStellenbosch ngamathathu kwelilodwa. Awayiqalanga kahle wobabili iligi lamaqembu njengoba iSwallows isendaweni ye-14, i-Arrows yona ikweye-11. Umdlalo ozolandela oweSupersport United ne-Orlando Pirates, wona ozoqala ngehora leshumi nambili emini. Lo mdlalo ungowamagqubu kwazise ngesizini edlule iSuperSport United yaphuca iqatha emlonyeni, yahlwitha iligi ngomehluko waphuzu amabili.
IPirates ngaphandle kokuthi ifuna ukuziphindiselela kubafana basePitoli (iSuperSport United), kodwa ifuna ukuqhubeka nokuba sezithendeni zeMamelodi Sundowns ehlezi esicongweni. ISundowns emva kwemidlalo eli-10 izihola phambili ngamaphuzu angama-24, kuthi iPirates endaweni yesibili ibe nangama-23. Kanti neSupersport United ifuna ukusuka lapho ehlezi khona kulogi, ihlezi endaweni ye-10 ngamaphuzu ali-12.
NgeSonto ngehora leshumi ekuseni kuzovula AmaZulu FC neStellenbosch FC.IStellenbosch esinqobe iligi ngesizini yangowezi-2021/22, izofuna ukuqhubeka nokuba semaqenjini asembangweni kulogi njengoba ihlezi endaweni yesihlanu kulogi.
Ngeledlule ihlule iqembu lakhona esifundazweni iKwaZulu-Natal i-Arrows ngamathathu kwelilidwa. AmaZulu FC anengcindezi enkulu ukuthi enqobe njengoba esendaweni ye-15 kulogi. Umdlalo wokugcina nozoba ngele-12 emini oweKaizer Chiefs ehlezi endaweni yesithathu kulogi, izotholana phezulu neCape Town City yona ekweyi-7.
