Ubhememe olungefaniswe nalutho iGolf R
Emuva kokubikezela ngokutheleka kwayo eNingizimu Afrika nokuxokozela ezinkundleni zokuxhumana kulabo abebeyilangazelele, sekungumlando ukuthi iphupho lakwaVW lagcina lifezekile ngokutheleka kobhememe iGolf 8 R kuleli. Iqale ukudayisa eMzansi ngoMbasa.
Yize elaboHlanga lingabanga yingxenye yokwethulwa kwayo, okumqoka ukuthi lilitholile ithuba eliyingqayizivele lokuvivinya lomshini. Ingene kwabanye ozakwabo kuleli abadume ngejubane okuyiTiguan R nayo esesigabeni sezimoto zale nkampani yaseJalimane ezakhelwe amandla nejubane (perfomance). Amandla ayo afinyelela kuma-235kW ahambisana netorque engama-400Nm kuyenza ibe ngenamandla adlulele esigabeni samaGalofu. Ngaphezu kwalokho ibuye iqhwande ngawowonke amasondo, okwenza ukuthi ngemizuzwana eli-4,8 ukwazi ukunyaka isuka ku-0 ifinyelele e-100km/h.
Amandla abhalwe ngaphandle
Isakhiwo sayo ngaphandle kusuka phansi kuya phezulu akubuzwa ukuthi yakhelwe ijubane. Ishaya ngezinqawe ezine ezigqize ngechrome, ugqinsi lwamasondo ali-19 inch ayenza ikhase phansi, amabrake calibre aluhlaza okwesibhakabhaka engeza ubuhle, amaside skirts ezinhlangothini. Kulokhu uphawu luka R balushintshe kakhulu ngendlela abalunamathelise ngayo ebhuthini ngaphansana kwesibambo. Iphuma nesunroof evuleka ugabagaba ipanoramic egcwalisela ukuba yisporty. Akulula ukuzwa ubumnandi bayo uma uzoncika ejubaneni elisemthethweni eNingizimu Afrika, kodwa kudingeka ukuthi okungenani uyitholele umzila wejubane njengeDezis Racetrack eSouth Coast.
Ingaphakathi elehlukile
Awukwazi ukuthi ungathi usibeka nje isinqe bese kuyasuka lokho. Angikusho ukuthi sekukuningi okwehlukile uma uyiqhathanisa neyakwabo yeizukulwane esedlule. Le R iphuma nohuntshu lwe screen esili-10 inch esiqukethe konke ngemoto. Okuhle abakwenzile ukuthi iscreen basenze saqondana ngqo nomshayeli okwenza amehlo angagudluki nangengozi emgwaqeni.
Igiya lakhona lincanyana lidinga nje ukuliqhweba nomunwe ngaphandle kokusebenzisa amandla. Izihlalo zikubamba zikugomothele, zase zigqiza ngengcwepelezi yestich ezinophawu luka R ngaphezudlwana.
Uyakwazi nokusebenzisa amapaddles ukuyishintsha engithole kungenye yezindlela ezikahle zokuyizwa amandla, nezindlela ezihlukene zokuyishayela. Akuvamile ukuthi uhlobo lwesporty luvuleke ngaphakathi,kepha ababe nenhlanhla yokuyizwa abazange bakhale nakancane ngesikhala sngemuva. Isikhala sebhuthi singama-374 litres, kanti uma izihlalo zilalisiwe siyanda sifinyelele kuma-1 230 litres okungamumatha igrosa yenyanga yonke.
Injini: 2.0 litre: 235kW, 400Nm
Amandla:235 Nm, 400kW
Amagiya: 7 speed auto