Kulokhu sekubanjwe umoya ngamaProteas kweyeNdebe Yomhlaba
Iqembu lekhilikithi amaProteas lisethubeni lokuqeda isinyama eNdebeni yoMhlaba eqhubeka kwelaseNdiya. AmaProteas avele asezibekisele indawo kowandulela amanqamu. Kungenzeka abhekane ne-Australia. Ngemuva kwemidlalo eyisishiyagalombili ezikaRob Walter sezinqobe eyisithupha zaguqa kwemibili.
Namuhla ngo-10 ekuseni zizogoqa emayaqoqo ngokubhekana ne-Afghanistan emdlalweni obhekwe ngamehlo abomvu. Yize amaProteas aseseduze nesicoco seNdebe yoMhlaba angakaze asinqobe eminyakeni engamashumi amathathu nanye eyedlule kodwa kusekhona amabhawodi axegayo. Intatheli yalaboHlanga isibhekela lamabhawodi axegayo.
AmaProteas ayahluleka wokujaha izibalo zama-runs asuke ebekwe yizitha ebhodini:
AmaProteas asanqobe umdlalo owodwa ejaha isibalo sama-runs asuke ebekwe yizitha. Kuyo yombili imidlalo adliwe kuyona abejaha. Elakuleli liyingozi uma libhetha kuqala. Kuyona yonke imidlalo eliyidlale libhetha kuqala alikaze lihlanganise ama-runs angaphansi kuka-300.
Imidlalo elidonse kanzima lijaha:
SA v Holland:
AmaProteas ahlulekile wukujaha ama-runs ama-245 abekwe yi-Holland kuma-overs angama-50. Aphume wonke aseshaye ama-runs ama-207 kuma-overs angu-42.5.
SA v Pakistan:
EzikaBavuma zinqobe ngomcicimezelo zishaya iPakistan ngewikhethi eyodwa sekuvalwe amehlo. Bezijaha isibalo sama-runs ama-270.
SA v India:
AmaProteas ashaywe ngembudlu yama-run aphinde angena ehlazweni. Akhishwe wonke enama-run angama-83 kuma-overs angama-26. Abejaha isibalo sama-runs ama-326.
Izibalo zama-runs libhetha kuqala:
AmaProteas ayinqobe yonke imidlalo ebhetha kuqala:
428 v Sri Lanka
311 v Australia
399 v England
382 v Bangladesh
357 v New Zealand
Ifomu kaTemba Bavuma:
Temba Bavuma:
UBavuma wenza kahle ekuthatheni izinqumo njengomholi weqembu kodwa ifomu yakhe yakamuva ngebhethi ishiya imibuzo. Akakaze ashaye u-50 noma u-100 kule Ndebe yoMhlaba. Kubadlali abayisikhombisa ababhetha kuqala nguyena kuphela ongakaze athole u-50 noma u-100.
Izibalo zikaBavuma umdlalo ngomdlalo koweNdebe yoMhlaba:
28 v New Zealand
11 v India
28 v Pakistan
35 v Australia
8 v Sri Lanka
12 v Bangladesh
16 v Holland
UQuinton De Kock udinga ukwehliselwa umthwalo:
Yingakho kumqoka ukuthi uBavuma athole ifomu kulo mqhudelwano. Ukwenza kahle kwakhe kuzokwehlisa umthwalo emahlombe kaDe Kock. Uma enze kahle nabanye badlala ngokukhululeka bese iNingizimu Afrika iyanqoba.
Amakhulu kaDe Kock nomthelela wawo:
SA v Sri Lanka:
100:
Ukwenza kahle kwakhe ethola ikhulu lama-run kunike uRassie Van Der Dussen no-Aiden Markram ithuba lokudlala ngokukhululeka. UVan Der Dussen ugcine eshaya ama-run angu-108 kwathi uMarkram waqoqa angu-106. INingizimu Afrika igcine inqoba.
SA v Australia:
109:
Ikhulu lakhe liyona eliweze uMzansi ngelabanzi ngesikhathi uqumba phansi ama-Aussies.
SA v Bangladesh:
174:
Ushaye ama-run angu-174. Lokhu kwakhe isisekelo esiqinile. UHeinrich Klaasen ugcine eshaya ama-run angu-109, uMarco Jansen wazitholela angu-75 njengoba uVan Der Dussen eshaye angu-60. AmaProteas aphinde aphumelela.
SA v New Zealand:
114:
UDe Kock ukuphindile lokho, amaProteas aphinde anqoba. Unike uVan Der Dussen oshaye ama-run angu-133 noDavid Miller oshaye u-50 emabholeni angu-50 ithuba lokudlala ngenkululeko.
Uma ngenzi kahle uDe Kock elakuleli lidonsa kanzima:
4 v England:
Yiwona kuphela umdlalo amaProteas angazange azwele kuwona uDe Kock eshesha ephuma kodwa asizwe wukuqala kahle kukaReeza Hendricks obethathe indawo kaBavuma obengaphilile. Kulo mdlalo uHendricks ushaye ama-runs angama-85.
20 v Holland:
AmaProteas agcine edliwe ngama-run angama-34.
5 v India:
Elakuleli lithelwe ngehlazo lama-runs ama-243.
4. Indlela esishwiba ngayo kuma-over angasekugcineni:
SA v India:
Sidedele ama-run ama-326. Abashwibi bethu bahlulekile wukuvala umdlalo ngenothi eliphezulu. Cishe bonke ngaphandle kukaKeshav Maharaj noKagiso Rabada bebexhaxhaza ama-run.
SA v Sri Lanka:
Ngemuva kokuhlanganisa ama-runs ama-400 kodwa sibuye sadedela ama-runs angaphezu kwama-300 yize umdlalo sigcine siwunqobile.
SA v Holland:
Kulo mdlalo iHolland ike yazithola ilahlekelwe amawikhethi ayisikhombisa isabeke ama-runs ali-140 kodwa yagcina ibeke ama-runs ama-248. AmaProteas agcine ekhale ngaphansi kulo mdlalo.