IMbube Iyokwamukela AmaBhokobhoko
ISILO sabe singumdlali wombhoxo eSt Charles College.
NgoMgqibelo umlando oyinqabakutholwa uqophekile. Iqembu lomboxo lakuleli eliholwa nguSiyamthanda Kolisi, amaBhokobho abe yiqembu lokuqala emhlabeni ukunqoba indebe yomhlaba amahlandla amane. Lo mlando uqopheke e-France phambi kwezihlwele zabantu. Ekufinyeleni esicongweni amabhokobho kudingeke ukuba edlule kwi-New Zealand. Njengoba bekulindelekile lomdlalo wamanqamu ubunzima kuwo womabili amaqembu kwazise womabili abeyizimvivilithi. Seku ngumlando ukuthi ezikaGxiya ( isithakazelo sakwaKolisi) ziwudlile umhlanganiso.
Ngokwezinhlelo amaBhokobhoko azofika nendebe kuleli ngoLwesibili nayilapho kulindeleke ukuba amakhulu ngamakhulu abantu bakuleli atheleke esikhumulweni sezindiza i-Oliver Reginald Tambo Airport. Phakathi kwabaholi abazobe bekhona yiSILO samabandla nesino mlando omude nomdlalo wombhoxo njengoba naso sabe singumdlali sisakhula.
Ihhovisi leSILO ngomlomo kaMntwana u-Afrika wasOnkweni likuqinisekisile kwelaboHlanga ukuthi nembala OMdala uzobe ekwaNdongaziyaduma ngoLwesibili.
“ ISILO sizoba yingxenye yezinkulungwane zabakuleli abazobe bamukela amabhokobhoko esikhumulweni sezindiza. OMdala uhlabeke umxhwele ngendlela amabhokobhoko avikela indebe i-Webb Ellis ihlandla lesine, kusho uMntwana wasOnkweni.
Sisengu mfana e-St Charles College sabe singumdlali wombhoxo. Ephawula ngalomlando weSILO uThishanhloko uMnu u-Allen Van Blerk wacashunwa ethi :
“ISILO saba yingxenye yohambo lokuqala yeqembu lesikole eNew Zealand. Loluhambo lwabe luholwa nguThishanhloko osewathatha umhlalaphansi uMnu uRonnie Kuhn. Sabe sigijima njenge wing singumetshisi” .
Kulindeleke ukuba amaBhokobhoko alidabule lonke elakuleli ehambela amadolobha amakhulu etshengisa imiphakathi indebe yomhlaba. Ngokwezinhlelo kulindele ukuba atheleke eThekwini mhla zi-4 kuLwezi.
