Kusazoba nengwadla enkulu yokudla ezweni: Ucwaningo
Amaphesenti angama-49 abantu baseNingizimu Afrika bazolala bengadlile ngonyaka wezi-2025. Lokhu kuvele kwiShoprite Food Index ehlanganiswe yiWorld Data Lab eyethulwe ngoMsombuluko ukubungaza iWorld Food Day. Nokho, naphezu kwesibikezelo esifiphele, inkomba ibonisa ukuthi izenzakalo zabantu ababalekela ukuntula ukudla ziyathuthuka. NgoNcwaba, ukwehla kwamandla emali okudla ezweni kwehle kwafinyelela ku-8.2 % kusuka ku-10% wenyanga edlule.
Indlala iseyinkinga enkulu eNingizimu Afrika njengoba kusenenqwaba izwe yezinselelo zomnotho. Ukungalingani, isimo sezulu esibi esiqhutshwa ukuguquguquka kwesimo sezulu ezweni ngezinye zezinto eziholela ekuswelekeni kokudla. Ezifundazweni, iLimpopo izobhekana nokushoda kokudla okubi kakhulu ngowezi-2025.
“Ngonyaka wezi-2025 isibikezelo seWorld Data Lab amaphesenti angama-49 abantu baseNingizimu Afrika azobe ephila ngaphansi kwezimo zokuntula ukudla kanti u-21% wezingane uzobe ukhubazekile ngowezi-2025,” kusho uJack Gisby weWorld Data Lab.
Amaphesenti angu-70 ezingane eNingizimu Afrika azalelwa ebumpofu. Futhi, ngokweWorld Food and Agriculture Organisation, cishe abantu abayizigidi ezingama-20 emhlabeni wonke abanako ukudla. I-Shoprite Group ithi yingakho ibona ukushoda kokudla njengenkinga enkulu njengobhubhane lokhuvethe. IQembu lithi ngenxa yalokhu, lifuna ukuqinisa imizamo yalo yokunciphisa indlala ezweni ngokusebenzisana nezinhlaka ezahlukene.
“Inhloso yethu izoshintsha kakhulu inaliti yingakho kumele sisebenze ngokubambisana phakathi komkhakha wezolimo, ezokukhiqiza, abathengisi, uhulumeni kanye nama-NGO ukuze sibhekane nalokhu,” kusho uSanjeev Raghubir, oyiNhloko yeGroup Sustainability: Shoprite.
I-Shoprite Group ithi indlala isalokhu iyisithiyo ekuthuthukisweni komphakathi. Izibikezelo zenkomba zikhombisa ukuthi ama-47% abantu baseGauteng bazobe beswele ukudla kanti u-1% uzobe uvela ezindaweni zasemakhaya esifundazweni, kanti ama-99% uzoba yingxenye yabantu basemadolobheni.
