Kosala oyedwa: Isizwe sibambe umoya ngowaMabhokobhoko ne-Ireland
Kuzohlukana inhloko nesixhanti uma Amabhokobhoko esedudulana ne-Ireland emdlalweni wamaqoqo eNdebe yoMhlaba yebhola lombhoxo eqhubeka kwelaseFrance. La mazwe athwelwe ngeqoma azobanga amaphuzu kusasa ngelesi-9 ebusuku eStade de France.
Womabili aqale kahle kulo mqhudelwano enqoba imidlalo yayo yokuqala yamaqoqo. I-Ireland iqhwakele ngamaphuzu ayishumi emidlalweni emibili , Amabhokobhoko ayibambe kweyesibili ngamaphuzu ayisishiyagalolunye.
INingizimu Afrika iqumbe phansi iScotland ngamaphuzu angama-36 kwamathathu, kwathi ngeledlule yadlula ngehubo italabha iRomania ngo 76-0.
Ngakolunye uhlangothi ama-Irish abhabhadise iRomania ngamaphuzu angama-83 kwayi-8 ngaphambi kokubhubhisa iTonga ngama69 kwali-16.
ElaboHlanga lihlale phansi noVictor Matfield owanqoba iNdebe naMabhokobhoko ngowezi-2007 eFrance laxoxa ngalo mdlalo we-Ireland. Ingxoxo yakhe noZipho Singela ihambe kanje.
Zipho Singela (ZS): Ngabe yini ezoba ngukhiye kulo mdlalo waMabhokobhoko ne-Ireland?
Victor Matfield (VM): Kuzoba ngumdlalo ononhlonze. Ozonqoba uzophuma ngembobo yenaliti. Lona ngumdlalo ongagcina ulawulwa yizinqumo zikanompempe nangendlela ibhola elizogingqika ngakhona ngosuku lomdlalo. Okuhle wukuthi siqine kuzona zonke izindawo okuyinto esenza sibe ngaphezulu kancane kwe-Ireland.
Kuzosiphoqa ukuthi sikhahlele kahle, sibafake ingcindezi kumascrum bese siyakhonya kumaline outs. Kuzomele sibagojele ngendlela yokuthi sibaphoqe ukuthi basinike amapenalty scrum. Lokhu kuzokwenza ukuthi umdlalo siwuphathe.
Uma sike saphatha umdlalo sisethubeni lokunqoba ngoba sizochitha isikhathi esiningi engxenyeni yabo.
ZS: Yini ebenza babe yingozi?
VM: Bayathanda ukuligcina ibhola nokuliphatha isikhathi eside. Kumele senze isiqiniseko sokuthi uma beliphethe baligcina kakhulu ngakweyabo ingxenye. Okunye abadle ngakho yijubane ezinhlangothini. Udonga lwethu lwasemuva luzobamqoka kakhulu kulo mdlalo.
ZS: Ngabe lawa ngamazwe amabili asethubeni lokunqoba iNdebe yoMhlaba?
VM: Njengamanje mathathu amazwe asethubeni elihle kakhulu lokunqoba iNdebe yoMhlaba uma sibheka ifomu nomgqigqo. Lapha sikhuluma ngeNingizimu Afrika, Ireland nosokhaya iFrance. Kuzoba ngumqansa kwamanye amazwe ukuphazamisa la mazwe amathathu engikhuluma ngawo.
INew Zealand ne-England ngamazwe amabili angamangaza kodwa okwamanje Amabhokobhoko, Ireland neFrance bazihambela bodwa kwinkulumompikiswano yezwe elizonqoba iNdebe yoMhlaba.
ZS: Umphumela walo mdlalo uzosho ukuthini kula mazwe womabili?
VM: Ngaphambi kokuthi kuqale umqhudelwano besingafuni ukuhlangana neNew Zealand kuma-qaurterfinal kodwa ngendlela izinto ezihamba ngakhona ngathi iyona engcono. Yingakho kumele sishaye i-Ireland ukuze sizibeke ethubeni lokuqeda siqhwakele eqoqweni lethu.
IFrance isefomini futhi idlalela ekhaya. Ngakho asilwele ukuyigwema okwamanje. Ibukeka izoqeda esicongweni eqoqweni layo. Uma sobabili siqeda esicongweni sizogwemana. Yize kunjalo kodwa kumele silungele ukubhekana nanoma ngubani uma sizimisele ngokuvikela isicoco sethu.
Impi enkulu izoqala esigabeni somkhumulajezi. Okwenzeke kweyamaqoqo kuzobe sekungathi shu.
ZS: Kuze kube yimanje yini esakuhlabe umxhwele ngaMabhokobhoko kule Ndebe yoMhlaba?
VM: Sidlala ngokweqophelo eliphezulu okwamanje. Sesakhe usiko lapho kungakhathalele ukuthi kudlala bani. Osesikimini uqinile kanti osuka ebhentshini usezingeni elifanayo noqale umdlalo. Ngezikhathi zethu sasineqembu elaziwayo ukuthi elokuqala imidlalo bese kuba neqembu lesibili lokucuphisa. Njengamanje kubo bonke labadlali abangama-33, umdlali nomdlali usezingeni lokwenza umsebenzi ngokweqophelo eliphezulu. Iqembu lethu liqine kakhulu ngabadlali abasezingeni eliphezulu. Bayakwazi ukudlala uma bephethe ibhola kanti noma bengaliphethe basayingozi uma belithola.
ZS: Ubukhona sinqoba iNdebe yoMhlaba ngo-2007, ngabe yini ebalulekile uma ufuna ukunqoba lo mqhudelwano?
VM: Kumqoka ukubhekana nomdlalo owodwa ngesikhathi. Umdlalo nomdlalo owudlalayo ubalulekile. Asikho isikhathi sokweya izitha. Alikho iqembu elilula. Ngowezi-2007 ngesikhathi sinqoba iNdebe yoMhlaba, iFrance yakhipha iNew Zealand yase izithela ngabandayo yakhishwa yi-England esayidla ngo 36-0 kweyamaqoqo. Walala uyasala. Kufanele uhlale uvule amehlo ngaso sonke isikhathi eNdebeni yoMhlaba. Okubalulekile wukusebenzisa ithuba eliwela ezandleni zakho ngokulibamba ngezandla zombili.