UNxesi usakhala ngokugqoza kohlelo lokuphucula abasebenzi
UNgqongqoshe Wezokuqashwa Nezabasebenzi, uThulas Nxesi, uthi nakuba ukusebenza kweNedlac kuye kwaba ngcono onyakeni wezimali wezi-2022-23, inqubekelaphambili ekuguqulweni kwemakethe yezabasebenzi isahamba kancane.
UNxesi uthi ngemuva kokuthi osomabhizinisi, abasebenzi kanye nohulumeni bethule iziphakamiso zokuthi kubuyekezwe umthetho wezabasebenzi ngowezi-2021, lolu daba alukalungiswa.
Uthe ezinye zezichibiyelo eziphakanyiswe yizinhlangano zihlanganisa ukuthuthukisa ukusebenza kweNkantolo Yezabasebenzi kanye nezingxoxo ezihlangene ukuze kusizwe abasebenzi kangcono.
Ubekhuluma nezithunywa engqungqutheleni yeNedlac yama-28 eGallagher Convention Centre eMidrand.
“Udaba lokusalela emuva eNkantolo Yezabasebenzi selubeke engozini inqwaba yabasebenzi. Udaba olukhona ngabehluleli ambalwa asebenziswa ngokweqile eNkantolo Yezabasebenzi; wudaba olubucayi engicabanga ukuthi kudala siluxoxa. Ngaphandle uma sengeza abehluleli, sizobeka abasebenzi abaningi engozini. Kunamacala aseqhubeke iminyaka emithathu kuya kwemine,” kuphetha uNgqongqoshe.
