Kuvuka ukukhuluma okudala kuKhongolose namaKhomanisi
ISouth African Communist Party (SACP) inxuse i-African National Congress (ANC) ukuthi ixhumane namadlelandawonye ayo uma ithatha izinqumo ezinqala ezithinta uhulumeni.
Leliqembu lithi i-ANC kubukeka ngathi isiqhelile kwamadlelandawonye ayo uma iza ezindabeni zikahulumeni. UNobhala Jikelele weSACP uSolly Mapaila usho lamazwi ngesikhathi iqembu ligubha iminyaka eyi-102 eMarikana ngaseRustenburg, eNorth West. “Bameme osomabhizinisi ezingxoxweni eziyisipesheli, abakhulumanga nathi njengombimbi, abazange baye ngisho nakuNedlac. ICosatu iyakhala, ishiywe ngaphandle nayo kulezi zingxoxo. Zimayelana nani izingxoxo, [zimayelana] nokuphepha kwezamandla, ukuhanjiswa kwempahla ezweni.”
“Umnyombo womnotho waseNingizimu Afrika udingidwa nguhulumeni ngemali yezimali ngaphandle kokubandakanyeka kombimbi lwakhe. Kufanele samukele umphumela walokho kungakhathaliseki ukuthi sasiyingxenye noma cha. Lena akuyona indlela yokusingatha umfelandawonye,” kwengeza uMapaila. Khonamanjalo i-ANC ithe kubalulekile ukubumbana kombimbi, njengoba izwe lizilungiselela ukhetho lukazwelonke nolwezifundazwe ngonyaka ozayo.
USihlalo we-ANC uGwede Mantashe uthe, “Siyaludinga ubumbano lwethu. Angazi noma abantu bakubonile yini lokhu, amaqembu obandlululo namaqembu eBantustan ayahlangana futhi anenjongo eyodwa – ukususa i-ANC emandleni. Akuyona i-ANC kodwa lo mfelandawonye okumele ususwe emandleni.”