Kuhlukana izindlela kwabanye abadlali noSuthu
AmaZulu FC asekhiphe uhla lwabadlali abangekho ezinhlelweni zikaPlabo Martins ongumqeqeshi omusha weqembu. ElaboHlanga lihoshe ngemithombo yalo engashayi eceleni ukuthi Usuthu lisezinhlelweni zokunciphisa isikwati salo ngaphambi kokuthi kuqale isizini. Leli qembu yilona elidle ubhedu kuKZN Premier’s Cup ngempelasonto edlule. Lidumisele ngezulu iRoyal AM, I Maritzburg United neRichards Bay FC kowamanqamu obusePrincess Magogo Stadium, KwaMashu.
“UMartins usesithathile isinqumo ngabadlali afuna ukubagcina nahlose ukubadedela. Uhambise uhla lwabadlali abangekho ezinhlelweni zakhe kumengameli weqembu uSandile Zungu. Njengamanje umengameli weqembu usaxoxisana nabadlali ngezindlela zokuthi kuhlukwane ngoba bonke abadlali abangekho ezinhlelweni zomqeqeshi basanezinkontileka neqembu,” kubeka umthombo ongaphakathi oSuthwini.
AmaZulu azobhekana neMbabane Swallows kusasa ngele-12 emini kowandulela amanqamu ePrince Mangosuthu Legacy Cup ezobanjelwa Olundi Stadium. “Abadlali abangekho ezinhlelweni zomqeqeshi nguMxolisi Kunene, Thendo Mukumela, Mswati Mavuso, Jean-Noel Amonome noGuily Manziba. UMukumela, uJean noManziba sebezisayinile izivumelwano zokuhlukana. Ngakolunye uhlangothi isabambene ngezihluthu phakathi kukaMavuso, Kunene nomengameli weqembu. Kuvela ukuthi Usuthu lufuna ukunikeza labadlali imali yezinyanga ezine kanti izimenenja zabo zifuna Usuthu luyikhokhe igcwale. UMavuso usasalelwe yiminyaka emibili kanti uKunene usalelwe ngunyaka owodwa,” kuchaza umthombo. Ufike Osuthwini ethwelwe ngeqoma kodwa wanganikwa ithuba lokuzobonakalisa.
Usayine inkontileka yezinyanga ezinhlanu ebihamba nombandela wokuthi yelulwe. NgoNhlaba iqembu lithathe isinqumo sokuyivuselela inkontileka kaMavuso.
“Indaba kaMavuso ihambisana nepolikiti yangaphakathi. Kunomqeqeshi obengayizwa indaba yakhe kuMaZulu. Nguyena othathe isinqumo sokuthi akhululwe,” kuqhuba umthombo. ElaboHlanga lihoshe izindaba zokuthi uMavuso ufunwa yiTS Galaxy FC neCape Town Spurs.
“IGalaxy ingase ilahlekelwe nguBathusi Aubaas. Isiqalile ukuthungatha umdlali ozovala isikhala sakhe uma kwenzeka egcina eshiya eqenjini. IRockets vele isanda kuhlukana noXola Mlambo. Ukuhamba kwakhe kushiye imbobo,” kusho umthombo. UKunene kuvela ukuthi ufunwa uthuli yiRichards Bay FC ephethwe nguSifiso “Jomo” Biyela. “UKaitano Tembo uyazifela ngoKunene. Usevele usefongqe isigqoko kusihlalo weqembu wamcela ukuthi amsayinele uKunene. ITS Galaxy nayo isibhekile isimo sakhe njengoba isanda kulahlekelwa nguTshegofatso Nyama.” kuchaza umthombo. UNyama ujoyine iCape Town City njengokubika kuqala kwelaboHlanga emasontweni amane adlule. Ubeyibamba ngakwesokunxele emuva noma phambili.