Indodana kaGaddafi iqome ukuduba ukudla ejele
Indodana yomholi ongasekho waseLibya uMuammar Gaddafi ilashwa esibhedlela eLebanon ngemuva kokuduba ukudla emasontweni amabili edlule ikhala ngokuboshwa ngaphandle kwecala kusukela ngowezi-2015.
UHannibal Gaddafi uboshelwe eLebanon kusukela umshushisi emthwese icala lokufihla imininingwane mayelana nekusasa lika-Imam Musa al-Sadr, umfundisi waseLebanon wamaShi’ite Muslim owanyamalala esohambweni lwaseLibya ngowe-1978. Ememezela isinqumo sakhe sokuduba ukudla ekuqaleni kwale nyanga, uGaddafi – owayeneminyaka emibili ngesikhathi kunyamalala uSadr – uthe uyisisulu sokungabi nabulungiswa futhi usolwa ngento angayenzanga.
AmaShi’ite aseLebanon sekunesikhathi eside ebambe uhulumeni kaGaddafi, owaketulwa ngowezi-2011, waba necala ngokunyamalala kukaSadr, ethi iLibya yamthumba ngesikhathi sohambo.
UGaddafi uphuthunyiswe esibhedlela ngoLwesithathu esuka ebhilidini lombutho wezokuvikela lapho egcinwe khona, ngemuva kokuthi abasebenzi bakhona bebona sengathi isimo sakhe siya ngokuba sibi, kusho uNgqongqoshe Wezangaphakathi uBassam Mawlawi etshela abeReuters. UReem al-Dabri, omele uGaddafi, uthe isimo sakhe siya ngokuba sibi kakhulu. Ephawula ukuthi wayemncane kakhulu ngesikhathi sokunyamalala kukaSadr, uthe wayengahlanganise lutho nalolu daba futhi wambiza ngokuthi “uyisiboshwa sezepolitiki ngezizathu ezingadalulwanga”.
UHannibal Gaddafi wabaleka eLibya ngowezi-2011 njengoba amavukelambuso ahlasela umbuso kayise, wagcina efinyelele eSyria, lapho uDabri athi wathunjwa khona walethwa eLebanon ngowezi-2015. UMuammar Gaddafi wabanjwa wabulawa amavukelambuso ngowezi-2011. U-Sadr, i-Libya ethi ushiye izwe ephephile, kukholakala ukuthi wabulawa ngemuva nje kokubanjwa kwakhe.
USadr wasungula iShi’ite Amal Movement, ehambisana neHezbollah ephethe ipolitiki yaseLebanon yamaShi’ futhi ebiholwa kusukela ngowezi-1980 nguSomlomo wePhalamende uNabih Berri.