Izinyunyana zisithakasele isinyathelo samaholo kwa-Eskom
U-Eskom nezinyunyana zabasebenzi bafinyelele esivumelwaneni samaholo seminyaka emithathu sama-7%. Udaba lubuyele emuva eCentralized Bargaining Forum kulandela izinsuku ezimbili zezingxoxo zamaholo.
Isivumelwano samaholo sizosebenza kusukela mhla lu-1 kuNtulikazi wezi-2023 kuya zingama-30 kuNhlangulana wezi-2026 kubo bonke abasebenzi abaqashwe ngokugcwele kwa-Eskom.
INational Union of Mineworkers (NUM), iNational Union of Metalworkers of South Africa (NUMSA) kanye neSolidarity bebephakamise ukuthi kunyuswe amaholo ngamadijithi amabili kodwa manje sebezibophezele ekwamukeleni ukukhushulwa kwamaholo ngamaphesenti ayisi-7 kukhona neminye imihlomulo.
“Kuzoba ngama-7%, kunyaka wokuqala ama-7% kunyaka wesibili nama-7% kunyaka wesithathu. Mayelana nesibonelelo sezindlu, siphinde sibe ngama-7% iminyaka emithathu. Siphinde sibe ne-sweetener ka-R10 000 ezokhokhwa eminyakeni emibili yokuqala. NjengeNUM sijabule kakhulu ngokuthi lezi zingxoxo zamaholo ziphothulwe ngaphandle kokuya kwaCCMA noma thina siteleke,” kusho umkhulumeli weNUM uLivhuwani Mammburu.
Isikhulu esiphezulu sakwa-Eskom uCalib Cassim (osesithombeni) uthe isivumelwano sizoletha uzinzo enhlanganweni.
“Isivumelwano esihlangene sizohamba ibanga elide ekusimamiseni inhlangano yethu ngokuhlinzeka u-Eskom ngendawo nesikhathi esanele sokusebenzisana ngokubambisana ukuze kubhekwane nezinselelo zethu ezinzima kakhulu. Kuyaphawuleka ukuthi kungokokuqala ngqa eminyakeni engaphezu kweshumi ukuthi izinhlangothi zifinyelele esivumelwaneni kuleli gumbi.”
