Inesibunge kosaziwayo i-EFF muva nje
Eminyakeni elishumi eyedlule kwaba kuncane ukucabanga ukuthi ngesikhathi uMnu uJulius Malema ememezela ukuzalwa kwe-Economic Freedom Fighters (EFF), emuva kokukhonjwa indlela kuKhongolose wabe esungula iqembu elalizophenduka ikhaya kubaculi nosaziwayo. Ngaphansi kwesimo esejwayelekile, ukuzibandakanya namaqembu ezepolitiki kosaziwayo kuba indla beyifihla.
Ukuzalwa kwe-EFF kufike kwasishintsha lesi sithombe. Osaziwayo bangena belakanyana kuleli qembu kungabi ndaba zalutho. Owaba ivulandlela kwaba nguFana Mokoena owayelingisa indawo ka emdlalweni owuchungechunge iGenerations.
Ngaleso sikhathi leli qembu lase livele linosaziwayo wommeli uMnu uDali Mpofu.
Ngonyaka wezimali-2019 kwaba nokukhuluma okwehlukene ngesikhathi intandokazi yomculi uRingo Madlingozi wodumo lwengoma esihloko sithi Sondela, efungiswa njengelungu lePhalamende le-Economic Freedom Fighters. Sekungumlando ukuthi uRingo usebizwa ngoMhlonishwa uMadlingozi.
Uma ulandela ikhasi lakhe kuTweeter nakwezinye izinkundla zokuxhumana kuyavela ukuthi akasemandla emculweni. Izolo kufungiswe omunye usaziwayo emculweni u-Eugene Mthethwa wodumo lweqembu lesipansula iTrompies kanye nosaziwayo kwezokuxhumana uMnu uMzwanele Manyi.
OkukaMthethwa kudala kwahlaluka obala ukuthi yize ebeyilungu le-African National Congress (ANC), kepha ubekhombisa ukusondela nokuzwelana kakhulu ne-Economic Freedom Fighters.
Nguye uMthethwa owaba ngowokuqala ukukhuza ibhadi ebabaza ubudlova kumalungu e-ANC ashiya engalazi kuRingo ngesikhathi efungiswa njengelungu lePhalamende. Lolu daba luzoqhutshezwa kuBayede kusasa.